MADHIMISHO YA SIKU YA MTOTO WA AFRIKA MKOA WA SONGWE YAFANYIKA WILAYANI MOMBA

Imewekwa : June 21st, 2023

Maadhimisho ya Siku ya Mtoto wa Afrika ni siku ambayo inakumbukwa na jumuiya yote ya Umoja wa Afrika kutokana na umuhimu wake katika kupigania haki ya elimu bora ya mtoto wa Afrika isiyo na ubaguzi.

Maadhimisho haya yanafanyika ili kuenzi michango ya watoto wa Kiafrika walioshiriki kupinga ubaguzi wa Elimu iliyokuwa inatolewa wakati wa utawala wa Serikali ya Makaburu huko Afrika Kusini. Tarehe na mwezi kama wa leo mwaka 1976, Watoto zaidi ya 100 wa Kiafrika waliandamana kudai Elimu bora na hatimaye waliuawa na askari wa utawala wa Makaburu.

Maadhimisho ya Siku ya Mtoto wa Afrika mwaka 2023 yanafanyika yakiwa na ujumbe na dhima ya kuelimisha jamii katika kuhimiza Elimu bora na kuacha ubaguzi kwa watoto kwa Kauli mbiu inayosema “ZINGATIA USALAMA WA WATOTO KATIKA ULIMWENGU WA KIDIGITALI”.

Kumbukizi ya tukio hili linatia huzuni na uchungu sana duniani pia lipo jambo la kujifunza na ndiyo maana tunafanya maadhimisho haya kila mwaka. Jambo la huzuni zaidi ni kwamba watoto waliokuwa wawe viongozi wa leo waliuawa kikatili bila kujali matakwa yao. Inauma sana.

Jambo la kujifunza katika kumbukizi siku hii ni umoja, ukomavu wa kifikra na ujasiri wa watoto wa Afrika walioonyesha wakati wanadai haki yao ya msingi ambayo ni elimu bora. Kutokana na jitihada hizo za watoto zikiwemo kutembea zaidi ya nusu maili, kuliamsha hisia za kupinga ubaguzi wa rangi ulimwenguni kote. Umoja wa Nchi huru za Kiafrika (OAU) uliazimia na kupaza sauti ya kupinga ukatili na ubaguzi kwa watoto, juhudi ambazo ziliungwa mkono na Jumuiya za Kimataifa.

Ujumbe katika maadhimisho ya Mtoto wa Afrika mwaka 2023 unatukumbusha wazazi kumlinda mtoto wa “kisasa” dhidi ya ukatili wa kupigwa, kulawitiwa, kukosa elimu, kubaguliwa, kunyanyaswa, kutopata haki zake za msingi na kubwa zaidi ulimwengu wa tunaoita wa kisasa wa matendo maovu yanayopinga uwepo wa Mwenyezi Mungu.