'Ahadi Imetimia, Bilioni 119.9 Kutumika Mradi wa Maji Tunduma, Vwawa'

Imewekwa : May 20th, 2025

Waziri wa Fedha, Mhe. Dkt. Mwigulu Lameck Nchemba (Mb), ameshuhudia utiaji saini wa Mkataba wa Ujenzi wa Mradi wa Maji wa Tunduma - Vwawa, Kati ya Katibu Mkuu Wizara ya Maji, Mhandisi Mwajuma Waziri (kwa niaba ya Serikali) na Meneja Mradi wa Kampuni ya Ukandarasi ya China (China Civil Engineering Construction Corporation-CCECC), Ning Yunfeng.

Tukio hilo limefanyika katika Uwanja wa Shule ya Msingi Tunduma leo tarehe 20 Machi 2025 ambapo mradi huo kutoka Chanzo cha Maji ya Mto Momba, uliopo Wilaya ya Momba, mkoani Songwe utakaogharimu shilingi bilioni 119.9 za Tanzania.

Mradi huo utahusisha ujenzi wa chanzo cha maji (Intake) chenye uwezo wa kuhifadhi lita milioni 21.5, ujenzi wa Kituo cha kuchakata na kutibu maji chenye uwezo wa kuzalisha lita milioni 20 kwa siku, ujenzi wa mtandao wa mabomba ya kusafirisha maji yenye kipenyo cha milimita 100 yenye urefu wa kilometa 96, ujenzi wa matenki ya maji yenye uwezo wa kuhifadhi ujazo wa lita milioni 5 litakalojengwa katika Mtaa wa Uwanjani/Uhuru, Halmashauri ya Mji Tunduma, tenki la lita milioni 3 litakalojengwa katika Kijiji cha Ikana na tenki lenye ujazo wa lita milioni 2 litakalojengwa katika Kijiji cha Nkangamo, Ununuzi wa pampu, Ujenzi wa Ofisi na Vitendea kazi vingine.

Akihutubia mamia ya wakazi wa Mkoa wa Songwe waliojitikeza kushuhudia tukio hilo katika Uwanja huo mjini Tunduma, Waziri wa Fedha, Mhe. Dkt. Mwigulu Lameck Nchemba, amewahakikishia Wananchi hao kuwa Serikali itatoa fedha zote za kutekeleza mradi huo ambao ni ahadi ya Mhe. Dkt. Samia Suluhu Hassan, Rais Jamhuri ya Muungano wa Tanzania, ya kumtua mama ndoo kichwani.

Kwa upande wake, Waziri wa Maji, Mhe. Juma Aweso, amempongeza Mhe. Rais, Dkt. Samia Suluhu Hassan, kwa kutoa kiasi hicho cha fedha takriban shilingi bilioni 120, ambazo ni fedha za ndani, kwa ajili ya kuwaondolea adha ya maji Wananchi wa Tunduma, Vwawa na Mlowo, watakaofikiwa na mradi huo.

Mradi huo unatarajia kuwanufaisha wakazi 219,309 katika miji hiyo ya Tunduma, Vwawa na Mlowo, ambapo ujenzi wake utachukua miezi 18 kukamilika na kuanza kutoa maji safi na salama kwa Wananchi.

Matukio katika Picha: