Bajeti Zijibu Kero za Wananchi: RC Dkt. Francis

Imewekwa : February 5th, 2024

Benton Nollo na Shadida Salum, TTC

Mkuu wa Mkoa wa Songwe, Dkt. Francis Michael amezitaka Halmashauri zote mkoani humo kuhakikisha kuwa Bajeti zinazopangwa na kupitishwa na mamlaka hizo zinazingatia matakwa na kero za Wananchi ili matokeo yake yatatue kero zao.

Dkt. Michael amesema hayo wakati wa kikao kazi cha kuwasilisha mapendekezo  ya mpango na bajeti ya Halmashauri za Mkoa wa Songwe kwa mwaka wa fedha 2024/2025, kilichofanyika kwenye Ukumbi wa Mikutano katika Ofisi ya Mkuu wa Mkoa wa Songwe tarehe 05 Februari 2024.

Kikao hicho kimewahusisha Wakuu wa Wilaya zote za Mkoa wa Songwe, Wakurugenzi wa Halmashauri zote za Mkoa huo pamoja na Wakuu wa Divisheni na Vitengo vya Halmashauri zote 05 mkoani Songwe.

Aidha, Dkt. Michael amezitaka Halmashauri zote ndani ya Mkoa wa Songwe kuepuka migogoro ya ukusanyaji wa mapato na kuweka mikakati thabiti ya kushughulikia suala hilo ikiwa ni pamoja na kudhibiti mianya ya upotevu wa mapato kwa kuwa mapato mazuri ndiyo suluhisho la maendeleo ya miradi na uendeshaji wa Ofisi.

Katika hatua nyingine Mkuu Mkoa huyo amewataka Wataalam katika Halmashauri zote katika Mkoa huo kuwa wabunifu katika makadirio ya makusanyo ya fedha za ndani na kuepuka kuweka malengo madogo ambayo hata wakifikia asilimia 100 bado itakuwa haiakisi uhalisia na ni sawa na kijidanganya wenyewe.

Akizungumza katika kikao hicho Katibu Tawala wa Mkoa wa Songwe,  Happiness  Senada  ameweka msisitizo katika utekelezaji wa maagizo yaliyotolewa na Waziri wa Nchi, Tawala za Mikoa na Serikali za Mitaa (TAMISEMI), Mhe. Mohamed Mchengerwa (Mb), ambapo maagizo hayo ni pamoja na kuhakikisha kuwa  vipaumbele vya bajeti vinajibu hoja za Wananchi, kuweka mikakati ya kukusanya mapato, kudhibiti matumizi ya Mashine za kukusanya Mapato (POS), upelekaji wa fedha katika Miradi ya Maendeleo, kusimamia Miradi  na kuhakikisha inakamilika, Upelekaji wa asilimia 10 kwenye mfuko husika, utekelezaji wa hoja na kudhibiti fedha zinazokusanywa kupeleka benki.

Naye, Mkurugenzi wa Halmashauri ya Mji Tunduma, Mariam Chaurembo ameeleza kuwa Makadirio ya Makusanyo ya Mapato na Matumizi ya Halmashauri ya Mji Tunduma kwa mwaka wa fedha 2024/2025 inakadiriwa kuwa shilingi bilioni 36.3 ambapo kati ya fedha hizo shilingi bilioni 13,8 ni kutokana na vyanzo vya ndani, shilingi milioni 950.3 kwa ajili ya ruzuku ya uendeshaji (OC), shilingi bilioni 13.2 kwa ajili ya mishahara na shilingi bilioni 8.2 kwa ajili ya Miradi ya Maendeleo kutoka Serikali Kuu na Wahisani.

Chaurembo amebainisha kuwa pamoja na Vipaumbele vya Halmashauri ya Mji Tunduma, Mpango na Bajeti ya Halmashauri hiyo kwa mwaka wa fedha 2024/2025 umezingatia vipaumbele mbalimbali vya Kisekta kama vile kuimarisha masuala ya Utawala Bora, kuendeleza Watumishi, kuzingatia masuala mtambuka ikiwemo mapambano dhidi ya rushwa, madawa ya kulevya, maambukizi ya VVU na unyanyasaji wa kijinsia.

Ametaja mambo mengine yaliyozingatiwa ni kutenga fedha kwa ajili ya uendeshaji wa zoezi la Uchaguzi wa Serikali za Mitaa mwaka 2024, kutekeleza Sheria za Mipango Miji kwa kupima na kurasimisha makazi holela na kuandaa Hati Miliki za Ardhi, kuinua kiwango cha ukusanyaji mapato, utekelezaji wa Miradi ya Maendeleo katika ngazi za chini kwa kuzingatia asilimia 60 ya vyanzo vya ndani ikijumuisha asilimia 10 ya Mfuko wa Wanawake, Vijana na Watu Wenye Ulemavu.

Matukio katika Picha:

Mkuu wa Mkoa wa Songwe, Mhe. Dkt. Francis Michael akisikiliza kwa makini mawasilisho ya Wakurugenzi wa Halmashauri wakati wa kikao kazi cha kuwasilisha mapendekezo ya mpango na bajeti ya Halmashauri za Mkoa wa Songwe kwa mwaka wa fedha 2024/2025 kilichofanyika kwenye Ukumbi wa Mikutano Ofisi ya Mkuu wa Mkoa wa Songwe tarehe 05 Februari 2024.

Katibu Tawala wa Mkoa wa Songwe, Happiness Seneda akizungumza wakati wa kikao kazi cha kuwasilisha mapendekezo ya mpango na bajeti ya Halmashauri za Mkoa wa Songwe kwa mwaka wa fedha 2024/2025 kilichofanyika kwenye Ukumbi wa Mikutano Ofisi ya Mkuu wa Mkoa wa Songwe tarehe 05 Februari 2024 ambacho kiliongozwa na Mkuu wa Mkoa huo, Mhe. Dkt. Francis Michael.

Mkuu wa Mkoa wa Songwe, Mhe. Dkt. Francis Michael (kulia) akiteta jambo na Katibu Tawala wa Mkoa huo, Happiness Seneda (kushoto) wakati wa kikao kazi cha kuwasilisha mapendekezo ya mpango na bajeti ya Halmashauri za Mkoa wa Songwe kwa mwaka wa fedha 2024/2025 kilichofanyika kwenye Ukumbi wa Mikutano Ofisi ya Mkuu wa Mkoa wa Songwe tarehe 05 Februari 2024 ambacho kiliongozwa na Mkuu wa Mkoa huo, Mhe. Dkt. Francis Michael.

Mkurugenzi wa Halmashauri ya Mji Tunduma,  Mariam Chaurembo akiwasilisha vipaumbele vya bajeti ya Halmashauri hiyo kwa mwaka wa fedha 2024/2025 wakati wa kikao kazi cha kuwasilisha mapendekezo ya mpango na bajeti ya Halmashauri za Mkoa wa Songwe kwa mwaka wa fedha 2024/2025 kilichofanyika kwenye Ukumbi wa Mikutano Ofisi ya Mkuu wa Mkoa wa Songwe tarehe 05 Februari 2024 ambacho kiliongozwa na Mkuu wa Mkoa huo, Mhe. Dkt. Francis Michael.

Kikao kazi cha kuwasilisha mapendekezo ya mpango na bajeti ya Halmashauri za Mkoa wa Songwe kwa mwaka wa fedha 2024/2025 kilichofanyika kwenye Ukumbi wa Mikutano Ofisi ya Mkuu wa Mkoa wa Songwe tarehe 05 Februari 2024 ambacho kiliongozwa na Mkuu wa Mkoa huo, Mhe. Dkt. Francis Michael.