CCM WARIDHISHWA NA MATUMIZI YA BILIONI 1.5 UJENZI WA SHULE NA MASOKO TUNDUMA

Imewekwa : January 5th, 2022

Halmashauri ya Mji Tunduma, Wilaya ya Momba, Mkoani Songwe, imetumia kiasi cha shilingi Bilioni 1.507,936,715.62 kwa ajili ya ujenzi iliyotembelewa na kamati ya siasa ya chama cha mapinduzi kwa kutumia fedha za mapato ya ndani.

Mkurugenzi wa Halmashauri Philemon Magesa aliwaeleza wajumbe wa Kamati ya Siasa ya Chama cha Mapinduzi (CCM) Wilaya ya Momba wakiongozwa na Mwenyekiti wa Chama hicho, Twaha Maulid (Twist) waliofanya ziara ya kukagua miradi ya maendeleo inayotekelezwa na Halmashauri hiyo.

Magesa alisema kiasi hicho cha fedha zinazotumika katika utekelezaji wa miradi hiyo ni fedha za  makusanyo ya ndani kwa mwaka wa fedha wa 2021 hadi 2022 ambapo Halmashauri inategemea kukusanya kiasi cha shilingi Bilioni 5.6 

Akifafanua zaidi kuhusu miradi hiyo mbele ya wajumbe hao wa kamati ya Siasa ya Wilaya, Kaimu Mhandisi wa Halmashauri, Mhandisi Dickson Kisenime alisema kuwa  kiasi hicho cha fedha kimegawanywa katika miradi mitatu.

Aliitaja miradi hiyo na gharama zake kuwa ni  mradi wa Ujenzi  na Ukarabati wa maeneo ya wafanyabiashara wadogo (masoko)  katika mitaa ya Majengo, Maporomoko, Stend Kuu na Tazara unaogharimu kiasi cha shilingi milioni 451,808,211.62.

Mradi mwingini ni ujenzi wa kituo cha Afya cha Kata ya Chapwa ambacho gharama yake ni zaidi ya shilingi milioni 400, pamoja na mradi wa ujenzi wa shule mpya ya msingi Haisoja iliyopo kata ya Sogea utakaogharimu kiasi cha shilingi milioni 656,128,04.2.

"Wajumbe wa kamati ya siasa katika mradi huu mnaona tupo kwenye hatua ya kutengeneza msingi ni ujenzi wa Ghorofa moja ambalo litakuwa na vyumba kumi, vitano na ofisi mbili chini na vyumba vitano na ofisi mbili juu lengo la kujenga ghorofa ni kuendana na hali ya upatikanaji wa ardhi katika mji wetu wa Tunduma" alifafanua Mhandisi Kisenime.

Kwa upande wake, Mwenyekiti wa CCM Wilaya ya Momba, Mauld maarufu kama Twist alitumia nafasi hiyo kumshukuru Mkurugenzi wa Halmashauri ya Mji Tunduma na timu yake kwa kazi nzuri  ya kutekeleza miradi ya maendeleo katika Halmashauri hiyo ya Mji Tunduma.

Alisema Kamati yake imeridhishwa na miradi yote waliyoitembelea na kuikagua na kusema italeta tija kubwa kwa maendeleo ya wananchi wa Tunduma  na Wilaya ya Momba.

"Ndugu zangu kamati yetu haikuja kutembelea miradi tuu bali kuja kufanya ukaguzi wa kina na tumeridhishwa na miradi yote" alisema Twist.