'Chapwa Stendi Tumemaliza'

Imewekwa : April 2nd, 2024

Na Benton Nollo, TTC

Kikundi cha Vijana Waendesha Pikipiki cha Stendi ya Chapwa, Halmashauri ya Mji Tunduma kimefanikiwa kumaliza mkopo wake wa shilingi milioni 48.6 ambazo ni mikopo isiyo na riba kwa vikundi vya ujasiriamali ya Wanawake, Vijana na Watu Wenye Ulemavu kupitia asilimia 10 ya mapato ya ndani na marejesho kwa mwaka wa fedha 2022/2023.

Kikundi hicho chenye Wanachama 18 kimefanikiwa kumaliza mkopo huo kwa wakati tarehe 31 Machi 2024 ambao waliutumia kununua pikipiki 18, sasa wamekabidhiwa rasmi na Halmashauri ya Mji Tunduma, kadi za umiliki wa pikipiki hizo ambazo kwa sasa ni mali ya Kikundi hicho.

Akizungumza kwa niaba ya Mkuu wa Divisheni ya Maendeleo ya Jamii katika Halmashauri hiyo, Veronica Msemwa wakati wa hafla fupi ya makabidhiano iliyofanyika Makao Makuu ya Halmashauri leo tarehe 02 Aprili 2024, amesema kikundi hicho kimeonesha uaminifu mkubwa kwani kimekamilisha marejesho katika kipindi cha miaka miwili ya mkataba wa marejesho.

“Nitumie nafasi hii kuwapongeza kwa kumaliza mkopo wenu kwa wakati kwani mlikopeshwa Septemba 2022 na mmemaliza tarehe 31 Machi 2024, pia nawaasa mzitumie pikipiki hizi vizuri ili ziendelee kuwaingizia kipato na muendeleze kikundi chenu ili muweze kupata fursa nyingine zitakazotolewa na Halmashauri.” Alisema Msemwa.

Kwa upande wake Katibu wa Kikundi hicho, David Mwasaka ameishukuru Halmashauri ya Mji Tunduma kupitia Divisheni ya Maendeleo ya Jamii kwa kuwaamini na kuwakopesha vijana mkopo huo ambao umewafanya waweze kumiliki pikipiki hizo ambazo watazitumia kujiingizia kipato na kujikwamua kiuchumi.

"Kiukweli tunaishukuru sana Serikali ya Awamu ya Sita inayoongozwa na Rais Dkt. Samia Suluhu Hassan kwani kupitia Halmashauri ya Mji Tunduma tulikopeshwa shilingi milioni 48.6na tumefanikiwa kurejesha kwa wakati.

Mwasaka ametumia fursa hiyo kuwaasa vijana wengine ambao wanachukua mikopo kuwa waaminifu na kufanya marejesho kwa wakati ili fedha hizo ziweze kuwanufaisha vijana wengine wenye uhitaji.

Matukio katika Picha: