Chaurembo Atoa Maelekezo Uchaguzi wa Serikali za Mitaa

Imewekwa : September 26th, 2024

Na Benton Nollo, TTC.

Msimamizi wa Uchaguzi Halmashauri ya Mji Tunduma, Mariam Chaurembo ametoa maelekezo kuhusu Uchaguzi wa Serikali za Mitaa kupitia Kituo cha Redio cha Tunduma NLC FM tarehe 26 Septemba 2024.

Chaurembo ametoa maelekezo hayo muhimu ili Wananchi wafahamu kuhusu tarehe rasmi ya kufanyika kwa Uchaguzi huo ambao amesema utafanyika tarehe 27 Novemba 2024 ambapo vituo vya kupigia kura vitafunguliwa kuanzia saa mbili kamili (2:00) asubuhi hadi saa kumi kamili (10:00) jioni.

Aidha, Chaurembo ameyataja mambo mengine muhimu ya Wananchi kuyafahamu na kuyazingatia ni pamoja na muda na sehemu ya kuandikisha wapiga kura ambapo ameainisha kuwa uandikishaji utafanyika kwenye majengo ya umma na pale ambapo hakuna jengo la umma, uandikishaji utafanyika sehemu ambayo Msimamizi Msaidizi wa Uchaguzi atakuwa amekubaliana na viongozi wa vyama vya siasa.

Msimamizi huyo amesema zoezi la uandikishaji wa orodha ya wapiga kura litafanyika kuanzia tarehe 11 Otoba 2024 hadi tarehe 20 Oktoba 2024 na vituo vya uandikishaji  vitafunguliwa kuanzia saa mbili kamili (2:00) asubuhi hadi saa kumi na mbili kamili (12:00) jioni.

Pia, Chaurembo amewataka wakazi wote wenye sifa za kupiga kura muda ukifika wakajiandikishe ili waweze kushiriki uchaguzi ambapo amezitaja sifa za Mpiga Kura kuwa awe raia wa Tanzania, mwenye umri wa miaka 18 au zaidi, awe mkazi wa mtaa ambao uchaguzi unafanyika, awe na akili timamu na awe amejiandikisha kupiga kura katika mtaa husika.

Kadhalika, Chaurembo amewataka wakazi wenye sifa za kugombea nafasi yoyote katika uchaguzi huo wajitokeze na kugombea. Amezitaja sifa za mgombea kuwa ni lazima awe Mtanzania, awe na umri wa miaka 21 au zaidi, awe anaweza kusoma na kuandika Kiswahili au Kiingereza, awe anashughuli halali ya kumwezesha kuendesha maisha.

Chaurembo amezitaja sifa nyingine kuwa mgombea ni lazima awe na akili timamu na awe Mwanachama wa chama cha siasa na amedhaminiwa na chama hicho.  

Matukio katika Picha: