Chaurembo Awapongeza Walimu

Imewekwa : April 30th, 2025

Na Benton Nollo, TTC

Mkurugenzi wa Halmashauri ya Mji Tunduma, Mariam Chaurembo amewapongeza Walimu pamoja na Wadau mbalimbali wanaotoa michango wao katika Sekta ya Elimu kwenye Halmashauri hiyo kwani michango yao ya hali na mali ambayo imewezesha mazingira bora ya elimu na kuwezesha mafanikio hayo.

Chaurembo ametoa pongezi hizo alipokuwa akitoa taarifa ya hali ya elimu wakati wa hafla ya utoaji tuzo na kuwapongeza Walimu wa Halmashauri hiyo kwa kuongoza na kuwa ya kwanza katika Mkoa wa Songwe kwa matokeo ya mitihani ya taifa ya Darasa la Saba, Kidato cha Pili, Kidato cha Nne na Kidato cha Sita mwaka 2024.

Mgeni Rasmi katika hafla hiyo ambayo imefanyika katika Uwanja wa Shule ya Msingi Tunduma tarehe 30 Aprili 2025, alikuwa Katibu Tawala Mkoa wa Songwe, Happiness Seneda ambaye alimuwakilisha Mkuu wa Mkoa huo Mhe. Daniel Godfrey Chongolo.

"Kipekee tunamshukuru sana Mthibiti Ubora wa Elimu katika Halmashauri yetu, amekuwa msaada sana, ametukosoa, ametuelekeza na leo haya ndiyo mafanikio tuliyoyapata." Amesema Chaurembo na kuongeza;

" Tunatoa tuzo kwa Walimu waliofanya vizuri katika masomo...tunatoa tuzo na motisha kwa shule zilizofanya vizuri katika taaluma ndani ya Halmashauri ya Mji Tunduma, kwa shule zilizofanya vizuri katika miradi ya maendeleo iliyotekelezwa na inayoendelea kutekelezwa katika Halmashauri yetu."

Pia, Chaurembo amesema Halmashauri imetoa tuzo kwa shule zilizoboresha mazingira yao, kwa shule zenye madarasa ya awali yanayoongea, kwa shule zilizofuta KKK (Kusoma, Kuandika na Kuhesabu), kwa Maafisa Elimu Kata wote kwa kuwasimamia Walimu vizuri katika maeneo yao na kwa wadau kama Benki za NMB, NBC, CRDB na Posta.

Matukio katika Picha: