Chaurembo: Mpaka Juni 2024 Halmashauri Imehawilisha Bilioni 1.1

Imewekwa : October 23rd, 2024

Na Benton Nollo, TTC

Mkurugenzi wa Halmashauri ya Mji Tunduma, Mariam Chaurembo amesema mpaka kufikia  Juni 2024, Halmashauri hiyo imefanikiwa kuhawilisha fedha shilingi bilioni 1.111 kati ya shilingi bilioni 1.136 zilizotolewa na Serikali kupitia Mfuko wa Maendeleo ya Jamii (TASAF) kwenye mitaa 69 yenye kaya maskini 647 katika madirisha 19 ya Kipindi cha Pili cha Awamu ya Tatu ya utekelezaji wa Mpango wa Kunusuru Kaya Maskini ulioanza tarehe 10 Julai 2020.

Chaurembo ametoa ufafanuzi huo mara baada ya kuwasilishwa taarifa ya utekelezaji wa shughuli za Mpango wa Kunusuru Kaya Maskini kupitia Mfuko huo kwa Uongozi kutoka Makao Makuu ya TASAF ukiongozwa na Mwenyekiti wa Kamati ya Taifa ya Uongozi wa TASAF, Peter Ilomo ofisini kwake tarehe 23 Oktoba 2024.

Mkurugenzi huyo amesema kwa kipindi cha mwaka wa fedha 2024/2025 Kaya 449 zinatarajiwa kunufaika na miradi 26 ya ajira za muda kwa kufanya kazi na kulipwa ujira ambapo miradi hiyo inatarajiwa kuwa na thamani ya shilingi milioni 101.2 ilhali kati ya fedha hizo shilingi milioni 80.8 zitatumika kulipa ujira Walengwa na shilingi milioni 20.4 zitatumika kununua vifaa.

Uongozi huo katika Halmashauri ya Mji Tunduma umemtembelea Mnufaika wa TASAF, Fainala Sichinga anayeishi Mtaa wa Nansele, Kata ya Mpemba ambaye kutokana na Mpango huo ameweza kununua na kufuga kuku na mbuzi wakati mkazi mwingine wa Mtaa huo, Grace Msukwa ambaye naye ni mnufaika wa Mpango ambapo yeye ameweza kuboresha makazi yake na kufuga mbuzi ambapo uongozi huo umeweza kujionea mafanikio hayo.

Pia, Uongozi huo wa TASAF Makao Makuu umetembelea Mtaa wa Mwakakati, Kata ya Mwakakati na kukutana na Kikundi cha Tubhagile kinachojihusisha na ufumaji wa mikeka na uuzaji wa mitandio.

Kikundi kingine katika Mtaa huo kilichotembelewa na Uongozi huo ni TUMWAFA ambacho chenyewe kinajihusisha na uwekaji wa akiba na kukopeshana ambapo mpaka sasa kina akiba ya shilingi milioni 1.5.

Uongozi wa TASAF Makao Makuu umeridhishwa na namna shughuli za Mpango huo zinavyotekelezwa katika Halmashauri ya Mji Tunduma na kuahidi kuzifanyia kazi kasoro zinazojitokeza ambazo zipo nje ya uwezo wa Halmashauri.

Matukio katika Picha:

Mkurugenzi wa Halmashauri ya Mji Tunduma, Mariam Chaurembo akizungumza mara baada ya kuwasilishwa taarifa ya utekelezaji wa shughuli za Mpango wa Kunusuru Kaya Maskini kupitia Mfuko wa Maendeleo ya Jamii - TASAF katika Halmashauri hiyo kwa Uongozi kutoka Makao Makuu ya TASAF ulioongozwa na Mwenyekiti wa Kamati ya Taifa ya Uongozi wa TASAF, Peter Ilomo ofisini kwake tarehe 23 Oktoba 2024.

Mwenyekiti wa Kamati ya Taifa ya Uongozi wa TASAF, Peter Ilomo akizungumza ofisini kwa Mkurugenzi wa Halmashauri ya Mji Tunduma tarehe 23 Oktoba 2024 baada ya kutembelea Halmashauri hiyo akiwa ameambatana na Wataalam kutoka Mfuko wa Maendeleo ya Jamii - TASAF Makao Makuu.