Chaurembo: Viongozi wa Dini Tunawategemea

Imewekwa : May 21st, 2024

Na Benton Nollo, TTC

Mkurugenzi wa Halmashauri ya Mji Tunduma, Mariam Chaurembo amesema Serikali inawategemea Viongozi wa Dini katika kuhamasisha masuala ya lishe katika jamii kwa kuwa wana ushawishi mkubwa kupitia nyumba zao za ibada na jamii inawasilikiliza.

Chaurembo ameeleza hayo alipokuwa akifungua kikao cha Kamati ya Lishe ya Halmashauri hiyo kilichofanyika kwenye Ukumbi wa Mikutano wa Halmashauri ya Mji Tunduma tarehe 21 Mei 2024.

"Viongozi wa Dini mna mchango mkubwa sana wa kuibadilisha jamii kwa kuwa inawaamini na inawasikiliza...jamii yetu inakabiliwa na changamoto kubwa ya udumavu, niwaombe mnapokuwa kwenye nyumba za ibada tusaidieni kuielimisha jamii kukabiliana na changamoto hiyo kuzingatia suala la lishe kwa jamii hasa watoto."Amesema Chaurembo.

Akiwasilisha Mwongozo wa Utekelezaji wa Siku ya Afya na Lishe ya Kijiji au Mtaa (SALiKi), Afisa Lishe Halmashauri ya Mji Tunduma, Frida Muhindi amesema Mwongozo huo ni mkakati ambao umeshirikisha sekta mbalimbali zinazotoa huduma za kinga na tiba ambazo zinahusiana na lishe.

Muhindi amesema Mwongozo huo unatumika kuhamasisha mabadiliko chanya ya tabia zinazohusu afya na lishe katika jamii. Hivyo, Muhindi amesema Mwongozo huo umetayarishwa ili kurahisisha utekelezaji wa afua za lishe katika siku hiyo.

Ameongeza kwa kufafanua kuwa, huduma muhimu za Afya na Lishe ni za lazima katika ukuaji na maendeleo ya watoto walio katika umri chini ya miaka mitano (5), pamoja na jamii kwa ujumla.

Afisa Lishe huyo ameongeza kuwa huduma hizo kwa kawaida hutolewa katika vituo vya kutolea huduma za afya ambapo wazazi na walezi walio wengi hawana ufahamu mzuri wa huduma

Ameeleza kwamba SILiKi inatoa fursa kwa wazazi na walezi kupata huduma hizo katika jamii yao pamoja na kupata taarifa sahihi, kubadilishana na mawazo na kujadili changamoto mbalimbali zinazowakabili katika malezi ya watoto.

Aidha, pamoja na mambo mengine, pia Muhindi aliwasilisha mada kuhusu viashiria, visababishi na madhara ya utapiamlo katika jamii.

Matukio katika Picha:

Afisa Lishe Halmashauri ya Mji Tunduma, Frida Muhindi akiwasilisha Mwongozo wa Utekelezaji wa Siku ya Afya na Lishe ya Kijiji au Mtaa (SALiKi) wakati wa kikao cha Kamati ya Lishe ya Halmashauri hiyo kilichofanyika kwenye Ukumbi wa Mikutano wa Halmashauri ya Mji Tunduma tarehe 21 Mei 2024.

Afisa Ustawi Halmashauri ya Mji Tunduma, Anna Wandwi akizungumza kuhusu umuhimu wazazi na walezi kujenga utamaduni wa kuzungumza na watoto ili kubaini vitendo vya ukatili wanavyofanyiwa kwa nyakati ambazo wao mbali nao, wakati wa kikao cha Kamati ya Lishe ya Halmashauri hiyo kilichofanyika kwenye Ukumbi wa Mikutano wa Halmashauri ya Mji Tunduma tarehe 21 Mei 2024.