Chaurembo: Watahiniwa 4,613 Kuhitimu Tunduma

Imewekwa : September 10th, 2024

Na Benton Nollo, TTC 

Mkurugenzi wa Halmashauri ya Mji Tunduma, Mariam Chaurembo amesema Watahiniwa 4,613 wanatarajia kufanya Mtihani wa Taifa wa Darasa la Saba 2024 ambao kwa mujibu wa ratiba iliyotolewa na Baraza la Mitihani la Taifa (NECTA) unafanyika tarehe 11 na 12 Septemba 2024.

Chaurembo ametoa taarifa hiyo ofisini kwake leo tarehe 10 Septemba 2024 kwa kufafanua kuwa kati ya Wahitimu hao wavulana ni 2,102 na wasichana 2,511

Mkurugenzi huyo ambaye pia ni Mwenyekiti wa Kamati ya Mitihani ya Halmashauri ya Mji Tunduma amebainisha kuwa mtihani huo wa Taifa unajumuisha vituo 44 ambapo vituo 36 ni vya Serikali na vituo 9 ni vya binafsi.

Chaurembo ameeleza kuwa, tayari maandalizi yote yamefanyika kwa mujibu wa taratibu za Mitihani ya Taifa huku Wanafunzi na Walimu Wasimamizi wameshapewa mafunzo ya usimamizi wa mtihani huo.

Aidha, Chaurembo amewataka Wasimamizi wa Mtihani huo, kuzingatia Sheria, Kanuni na Taratibu wakati wote wa mtihani na kutokujiingiza kwenye aina yoyote ya vitendo vya udanganyifu kwa kuwa, lengo la Mtihani huo ni kuwapima Wanafunzi kulingana na kile walichojifunza kwa miaka yote waliyokuwa shuleni.

Kadhalika, Chaurembo ametoa rai kwa Walimu na Wazazi kuwaandaa Wanafunzi vema kisaikolojia, kiakili na kimwili, kwa kuwajengea uwezo wa kujiamini wakati wote wa mitihani kwa kuwa mtihani huo ni sawa na mitihani ambayo wamekuwa wakifanya mara kwa mara.

Uongozi wa Halmashauri ya Mji Tunduma, unawatakia kheri Wanafunzi wote katika Mtihani huo wa Taifa.