DC. Kihongozi: Wataalam Simamieni Miradi

Imewekwa : February 3rd, 2024

DC. Kihongosi: Wataalam Simamieni Miradi

Benton Nollo na Shadida Salum, TTC

Mkuu wa Wilaya ya Momba, Mhe. Kenani Kihongosi amewataka watendaji wa Halmashauri ya Mji Tunduma kusimamia miradi ya maendeleo na kutunza fedha za Serikali ili kujenga uaminifu baina yao na Wananchi.

Kihongosi ameyasema wakati wa kikao Maalum cha Baraza la Madiwani la Halmashauri hiyo kilichofanyika kwenye Ukumbi wa Mikutano wa Halmashauri tarehe 3 Februari 2024 kujadili Makadirio ya Makusanyo ya Mapato na Matumizi ya Halmashauri hiyo kwa mwaka wa fedha 2024/2025.

“Niwaombe Wataalam simamieni miradi, Serikali ya Awamu ya Sita inayoongozwa na Rais Dkt. Samia Suluhu Hassan inaleta fedha nyingi sana za miradi ninyi ndiyo watekelezaji…Madiwani piteni kwenye miradi ndani ya kata zenu ili muone ni kitu gani kimeletwa, kinatumikaje na ni nani ana jukumu la kusimamia utekelezaji wake kwa sababu tukisimamia vizuri fedha za serikali hata Wananchi watejenga imani na Serikali yao” Amesema Mhe. Kihongosi na kuongeza;

“Tutakuwa wakali kwa yeyote atakaye jaribu kuchezea fedha za Serikali, katika hilo hatutokuwa na huruma kwa sababu tutakuwa tunatimiza wajibu…pia, niwaombe wataalamu wetu tukasimame kwenye nafasi zetu vizuri ili tuwe Halmashauri ya mfano nchini…wekeni uzalendo mbele katika kutimiza majukumu yenu hapo tutafanikiwa.”

Baraza la Madiwani la Halmashauri ya Mji Tunduma kwa kauli moja limeridhia na kupitisha mapendekezo ya Makadirio ya Makusanyo ya Mapato na Matumizi ya Halmashauri hiyo kwa mwaka wa fedha 2024/2025 ambayo ni shilingi bilioni 36.3.

 Ambapo kati ya fedha hizo shilingi bilioni 13.8 ni kutokana na vyanzo vya ndani, shilingi milioni 950.3 kwa ajili ya ruzuku ya uendeshaji (OC), shilingi bilioni 13.2 ni mishahara na shilingi bilioni 8.2 ni kwa ajili ya miradi ya maendeleo kutoka Serikali Kuu na Wahisani.

Matukio katika Picha: