DC LULANDALA ALIONGOZA BARAZA LA MADIWANI LA TUNDUMA ZIARANI MOSHI

Imewekwa : March 2nd, 2023

Mkuu wa Wilaya ya Momba Mhe. Fack Lulandala ameliongoza Baraza la madiwani na Baadhi ya Wakuu wa Divisheni na Vitengo katika ziara ya siku Mbili Halmashauri ya Manispaa ya Moshi Mkoani Kilimanjaro

Halmashauri ya Mji Tunduma imekuwa ikifanya vizuri sana katika ukusanyaji wa mapato na elimu kwa nia ya kufanya vizuri katika utunzaji wa Mazingira na Usafi baraza la madiwani likaona lifanye ziara ya siku mbili kwa ajili ya kujifunza mbinu nzuri wanazozitumia Manispaa ya Moshi katika zoezi zima la usafi

Akiongea wakati wa ziara hiyo Mkuu wa Wilaya ya Momba Mhe. Fack Lulandala amesema kuwa Halmashauri ya Mji Tunduma imefanya chaguo sahihi kabisa kwani Manispaa ya Moshi inang’aa mitaa yote na hakuna takataka barabarani wala katika mitaro

“Hongereni sana Manispaa ya Moshi kwa kazi nzuri mnayoifanya katika usafi, tangu nimeingia Moshi naona kila eneo ni safi sioni makopo wala takataka zozote barabarani na mitaani kwakweli mnafaa kuwa darasa la Halmashauri nyingine kuja kujifunza hapa” alisema Mhe. Lulandala

Kwa upande wake Mkurugenzi wa Halmashauri ya Mji Tunduma Philemon Magesa ameeleza kuwa Tumejifunza Moshi kuwa jambo la usafi ni ajenda ya kudumu na ipo tangu zamani hivyo hapa kinachotakiwa ni elimu kwa watu wajue umuhimu wa kutunza mazingiza kwanza na hapo tutafanikiwa kuibadilisha Tunduma

“Tunaondoka na somo kubwa la kwenda kuibadilisha jamii ya Tunduma ili wajue swala la Usafi ni swala la maisha yetu ya kila siku hivyo lazima kila mtu afanye usafi bila kusukumwa na sheria za Halmashauri, jamii yetu tukiielimisha vya kutosha basi swala la Usafi Tunduma litakuwa la kudumu kama ilivyo Manispaa ya Moshi kwa sasa hadi tunakuja kujifunza” alisisitiza Mkurugenzi Magesa

Naye mwenyekiti wa Halmashauri ya Mji Tunduma Mhe. Ayubu Mlimba amesema kutokana na nia ya Halmamashauri ya Mji wa Tunduma kuwa Manispaa lazima tujifunze kwa wakongwe wanaofanya vizuri ndio maana tumeamua kuja Moshi

“Jambo kubwa nililojifunza hapa kumbe hatutakiwi kuziogopa takataka maana ni Fursa kubwa sana na kuzichukia taka ni zambi kwani ni chanzo kikubwa sana cha mapato katika Halmashauri ni kujua tu kuzibadilisha na kuwa kitu kingine ambacho kinaweza kuwa Mbolea au mapambo inategemea na ubunifu wa Halmashauri Husika mlivyojipanga” alisema Mhe. Mlimba

Mhe. Mlimba ameyasema hayo alipotembelea Guba la Manispaa ya Moshi na Kukuta kiwanda cha kuzalisha Mbolea ya Asili (Mboji)

Katika kudhibiti uchafuzi wa Mazingira unaotokana na kelele, mitetemo, maji taka, hewa chafu na ardhi,  Halmashauri ya Manispaa ya Moshi  inafanya ukaguzi kwenye maeneo mbalimbali, Pia inatoa elimu kwa jamii kuhusu njia bora za kudhibiti uchafuzi wa mazingira na athari zake. Sheria za Mazingira pamoja na sheria ndogo za Halmashauri hutumika kudhibiti uchafuzi wa Mazingira.