DC LULANDALA AWAPA MACHINGA SIKU 3 KUHAMIA KWENYE SOKO LAO

Imewekwa : August 25th, 2023

Wafanyabiashara wa wadogo (machinga) ambao wanauza bidhaa zao kwenye hifadhi ya barabara wamepewa siku 3 kuanzia leo 16 Agosti 2023 hadi siku ya ijumaa wawe wamehamia kwenye soko la machinga lililopo stendi ya zamani ambalo limeandaliwa kwa ajili yao.

Mkuu wa Wilaya ya Momba, Mhe. Fack Lulandala amesema zikipita siku 3 kazi ya kuhakikisha hakuna mfanyabiashara anapanga bidhaa zake barabarani iwe asubuhi, mchana au usiku itaanza na watakaokutwa watachukuliwa hatua kali.

Mhe. Fack Lulandala ametoa kauli hiyo baada ya wafanyabiashara wa soko la machinga kuandamana na kufunga barabara ya Tunduma-Sumbawanga na kuitaka Serikali kusimamia na kuwaondoa wafanyabiashara wenzao wanaouza kwenye masoko ambayo si rasmi tofauti na maelekezo ya Serikali ya hapo awali.

Kiingozi wa Machinga, Ndg. Jastini Kashililika amesema wameamua kuchukua hatua hiyo baada ya kuona makubaliano yao kati ya Halmashauri na wamachinga ya kuwataka wafanyabiashara wote ambao wanaunza barabarani mwisho iwe tarehe 12 Agosti 2023 wote wawe wamehamia soko la machinga.

"Kuna watu wanaendelea biashara zao barabarani wakati Serikali ilikuwa na lengo la kutuondoa wote na kutuleta hapa barabarani sasa inakuwaje wengine wabaki, tunataka wote tuje hapa tufanye biashara kwa pamoja wote" Ndg. Jastini Kashililika.

Mwenyekiti wa Halmashauri ya Mji Tunduma, Mhe. Ayubu Mlimba amesema kuanzia kesho tarehe 17 Agosti atawaongoza madiwani wenzake kutoa elimu kwa wafanyabiashara wadogo ili kuwaandaa kuja katika soko la machinga.

Kaimu Mkurugenzi wa Halmashauri ya Mji Tunduma, Mwanaisham Shemaghembe amesema Halmashauri itahakikisha inaongeza taa katika soko la machinga ili biashara ziweze kufanyika hadi midaa ya usiku pamoja na kumwagia maji katika eneo la soko na kuliweka sawa ili kuondo vyumba.

Mkuu wa Wilaya, Mhe. Fack Lulandala amesema kuanzia Jumatatu eneo la stendi ya zamani lilipo soko la machinga ndio kutakuwa kituo kikuuu kwa daladala ambazo zinafanya safari zake ndani ya Mji wa Tunduma.

Wakati huo huo, Mkuu wa Wilaya ameitaka LATRA na Polisi kupanga vizuri vituo vya kushuka na kupanda kwa daladala.