DC MBOZI AWAPA WANAWAKE SIRI YA MAFANIKIO, AWAPA USHAURI WATEULE WA RAIS

Imewekwa : March 9th, 2023

MBOZI. Mkuu wa Wilaya ya Mbozi (DC), Esther Mahawe amewataka wanawake wa mkoa wa Songwe kutokata tamaa wakati wanapoanguka katika safari ya kujikwamua kiuchumi bali wapambane huku akiwashauri wanawake walioteuliwa na Rais Samia Suluhu katika nafasi mbalimbali kufanya kazi kwa bidii.

DC Mahawe amesema hayo leo Jumatano Machi 8, 2023 akimwakilisha Mkuu wa Mkoa wa Songwe Dk Francis Michael wakati wa kilele cha maadhimisho ya Siku ya Wanawake Duniani ambayo kimkoa yanafanyika katika viwanja vya CCM Vwawa wilayani Mbozi.

Amesema kuwa katika zama hizi mwanamke anatakiwa apambane na pale anapojaribu na kufeli asikate tamaa.

"Tukikaa tukisubiri kuwezeshwa tutachelewa, hizi ni kauli ambazo zimetucheleweshwa kwamba katika mafanikio ya mwanaume mwanamke yuko nyuma" amesema DC huyo na kuongeza;

Tumezubaishwa, sasa hivi ni pembeni ya kila baba aliyeendelea yuko mama na pembeni ya kila mama aliyeendelea kuna baba" amesema

Amesema sababu inayowachelewesha wanawake wengi ni kutokujiamini hivyo kutoa wito kwa wanawake wajiamini.

"Kutokujiamini na kutothubutu, mwanamke unaweza sana, ukianguka nyanyuka anza tena.. kufeli ni sehemu ya kukupeleka kwenye mafanikio, feli sana na jaribu sana utafanikiwa" amesisitiza

Ametoa wito kwa wanawake ambao wamepata nafasi hasa za kuteuliwa na Rais Samia Suluhu Hassani katika ngazi mbalimbali kufanya kazi kwa bidii ili kudhihirisha kuwa wana uwezo.

"Niwaombe wanawake tulioaminiwa na Rais Samia tusijaribu kumuangusha, tunaweza sana tuamini kuwa tunaweza" ameshauri

"Ni neema Mungu kumchagua Rais Samia ili kuonyesha mfano kuwa wanawake tunaweza" amesisitiza

Aidha Mkuu huyo wa wilaya amewashauri wanawake waliopata nafasi kutowadharau waume zao.

"Nafasi ya mwanaume itabaki palepale, sio kuwa mwanamke umepata fursa ndio uwadharau wanaume hapana, hata kama una fedha kuliko yeye, Mungu akupe hekima

Sio una fedha zako nyumbani unataka uwe kiongozi" ameshauri DC huyo huku washiriki wakishangilia

"Tukipewa hizi nafasi zisiwe sehemu ya mateso kwa waume zetu" amesema