DC MOMBA AWAKONGA NYOYO WAZEE WA TUNDUMA

Imewekwa : October 1st, 2022

Mkuu wa Wilaya ya Momba Mhe. Fakii Lulandala ameshiriki siku ya maazimisho ya Siku ya Wazee Duniani yaliyofanyika kiwilaya katika Ukumbi wa Honeymoon Hotel uliopo kata ya Makambini. Wakati anaongea na wazee hao Mhe. Fakii lulandala aliwaambia wazee kuwa

 “Mkinihitaji mimi muda wowote nitakuja kuwasikiliza, tena msiniombe mniambie mtotowetu njoo, mimi nitakuja kuwasikiliza na kutatua kero zenu” 

Serikali inatambua umuhimu wa wazee katika maendeleo ya taifa letu. Aidha serikali inatambua kuwa wazee ni hazina na rasilimali muhimu katika kukuza uchumi na maendeleo ya nchi yetu. Misingi ya nchi tuliyonayo sasa imejengwa na wazee wetu. Wazee ndio wamesaidia ukombozi wa nchi hii pamoja na ukombozi wa nchi mbalimbali za Afrika. Umoja wa Kitaifa tulionao, amani tunayojivunia, maliasili mbalimbali na utamaduni wa Mtanzania zimetokana na mchango wa wazee tulio nao katika taifa letu. Mchango uliotolewa na  wazee wetu katika nyanja za kisiasa, kiuchumi, kiutamaduni na kijamii ndio matokeo ya kuwepo kwa taifa letu.

Kauli Mbiu ya maadhimisho ya mwaka huu inasema ‘‘Ustahimilivu na mchango wa wazee ni muhimu kwa maendeleo ya Taifa’’. Kauli Mbiu hii inatukumbusha kuwa familia inawajibika kwa kiasi kikubwa katika kutoa huduma za msingi kwa wazee.

Sera ya Taifa ya Wazee ya mwaka 2003 inatoa maelekezo kuwa familia itaendelea kuwa taasisi ya msingi katika kutoa matunzo kwa wazee.  Katika makazi itakuwa kimbilio la mwisho baada ya njia nyingine za matunzo kushindikana.

Serikali imekuwa ikitoa huduma kwa wazee kwa kuzingatia Sera ya Taifa ya Wazee ya mwaka 2003, Sera ya Afya 2007 na Miongozo mbalimbali lengo likiwa ni kuhakikisha wazee wanastawi vyema na kupatiwa fursa sawa pasipo kubaguliwa kwa namna yeyote ile.

Wote tunafahamu Suala la uzee na kuzeeka limekuwa lenye umuhimu mkubwa kwa Taifa kwa ujumla hasa kuhusiana na mitazamo ya kiuchumi, kisiasa na kijamii. Wazee ni moja ya kundi lililokuwa limetengwa katika jamii na hivyo nguvu za ziada kutoka kwa serikali na wadau kwa ujumla zimeendelea kufanyika ili kuhakikisha wanapatiwa haki zao za msingi.

“Napenda kutumia fursa hii kuwaomba wazee msaidie juhudi za kulinda utamaduni na maadili mema ya Watanzania. Mmonyoko wa maadili umekithiri katika jamii” alisema Mhe. Fakii

Aidha, kumekuwa na ongezeko kubwa la vitendo vya Ukatili wa Kijinsia na Ukatili dhidi ya Watoto. Ni vyema wazee wetu mkaendelea kutukumbusha tamaduni na maadili yatakayosaidia kuwa na jamii inayoheshimu utu, usawa wa kijinsia na yenye ari ya kushiriki shughuli za maendeleo.

Ili kukabiliana na changamoto mbalimbali zinazowahusu wazee; serikali itafanya yafuatayo;

• Kutoa elimu kwa familia na jamii kuhusu wajibu wao katika kutunza wazee
• Kuhimiza jamii kutoa matunzo kwa wazee wasio na ndugu
• Kuendelea kuhimiza Utungaji wa Sheria ya Wazee
• Aidha, serikali itahakikisha wazee wanashiriki na kushirikishwa katika masuala mbali mbali ya kiuchumi, kisiasa na kijamii kwa kuzingatia kanuni na sera za nchi