DC Mwandobo Akutana, Wamiliki wa Maegesho

Imewekwa : April 16th, 2025

Benton Nollo na Atwiya Mohamed, TTC

Mkuu wa Wilaya ya Momba, Mhe. Elias Mwandobo amekutana na wamiliki wa maegesho ya magari tarehe 16 Aprili 2025 ili kujadili namna ya kuratibu malori na magari madogo yanayohitaji huduma ya maegesho wakati yakisubiri kuendelea na safari au kukamilisha taratibu za kiforodha katika mpaka wa Tunduma.

Akizungumza na wamiliki hao katika kikao kichofanyika kwenye Ukumbi wa Mikutano wa Halmashauri ya Mji Tunduma, Mhe. Mwandobo amesema kuwa haipendezi mji kuwa na maegesho halafu malori yanaegeshwa bila utaratibu pembezoni mwa Barabara ya Tanzania na Zambia - TANZAM jambo ambalo ni hatari kwa watumiaji wengine wa Barabara hiyo.

Aidha, alisisitiza kuwa Halmashauri kwa kushirikiana na wadau mbalimbali itakaa na kuratibu ni namna gani ya kufanya ili huduma za maegesho ziwe na faida kwa Wananchi na Halmashauri iweze kupata mapato.

Kwa upande wake, Mkurugenzi wa Halmashauri ya Mji wa Tunduma, Mariam Chaurembo amesema ifikapo Julai 2025 utaratibu wa maegesho utakuwa wa kulipia kwa gari moja kwa siku ambapo wamiliki wa maegesho watatakiwa kulipa tozo kutokana na idadi ya magari yaliyoegeshwa katika maegesho husika kwa siku.

Amewasisitiza Wamiliki wa maegesho ya magari kuzingatia suala la usafi katika maegesho yao liwe ni kipaumbele namba moja ili kuweka Mji safi na salama, ikiwa ni pamoja na kuweka Huduma ya Kwanza (First aid kit) ili iwe msaada kwa madereva wanaopaki kwenye maegesho yao.

 Aidha, ametoa rai wamiliki wa maegesho kuwa si salama kiafya kwa madereva kulala ndani ya magari yaliyoegeshwa katika maegesho yao na hivyo waone namna bora ya madereva kupata hifadhi.

Matukio katika Picha: