DC Mwandobo Akabidhi Vifaa vya Ufundi

Imewekwa : May 15th, 2025

Na Benton Nollo, TTC

Mkuu wa Wilaya ya Momba, Mhe. Elias Mwandobo amekabidhi vifaa vya ufundi na mahitaji ya shule kwa vijana rika barehe na Wanafunzi waishio mazingira magumu katika Halmashauri ya Mji Tunduma vyenye thamani ya shilingi milioni 44.1 kwenye hafla fupi iliyofanyika katika Shule ya Msingi Katete tarehe 15 Mei 2025.

Kati ya fedha hizo, hivi karibuni Halmashauri hiyo kupitia Programu ya IPOSA inayofadhiliwa na Shirika la UNICEF ilipokea vifaa vya ufundi vyenye thamani ya shilingi milioni 27.1 kwa ajili ya vijana 97 waliopo katika vituo viwili vya Shule ya Msingi Katete (vijana 58 ambapo wasichana ni 38 na wavulana ni 20) na Shule ya Msingi Tunduma (vijana 39, wasichana 35 na wavulana 4).

Ambapo kupitia Programu hiyo, kozi za ufundi wafakazojifunza zitatolewa bure ambazo ni ushonaji, ufundi umeme, Kompyuta, kilimo, ufugaji kuku, ususi, uashi pamoja na utengenezaji batiki na sabuni.

Pia, Shirika la ADP Mbozi kupitia Programu ya Kizazi Hodari nalo limeleta mahitaji ya shule kwa Wanafunzi waishio mazingira magumu vyenye thamani ya shilingi milioni 16.9 ikiwa ni madaftari 34,300, kalamu 28,000 na taulo za kike 5,520.

Halmashauri ya Mji Tunduma kwa kushirikiana na Shirika la UNICEF inaendelea na Kampeni ya Uhamasishaji wa kuwarudisha Shule Watoto walioacha au ambao hawajaandikishwa shule.

Ikiwa kuna Watoto ambao hawajaandikishwa shule na umri wao ni mkubwa kuanzia miaka 8 hadi 12, watoto hao wataandikishwa kupitia Mpango wa Elimu ya Msingi kwa Waliokosa (MEMKWA).

Kadhalika, kwa watoto walioacha shule kupitia Kampeni hiyo watatakiwa kurudi shule bila masharti yoyote ili kuendelea na masomo yao.

Hata hivyo, kwa vijana rika barehe ambao walishamaliza Elimu ya Msingi na Sekondari na wapo tu nyumbani wanahamasishwa kujiunga na mafunzo ya ufundi kupitia Programu ya IPOSA inayofadhiliwa na Shirika la UNICEF.

Matukio katika Picha:

Mkuu wa Wilaya ya Momba, Mhe. Elias Mwandobo akizungumza wakati wa hafla fupi ya kukabidhi vifaa vya ufundi na mahitaji ya shule kwa vijana rika barehe na Wanafunzi waishio mazingira magumu katika Halmashauri ya Mji Tunduma vyenye thamani ya shilingi milioni 44.1, iliyofanyika katika Shule ya Msingi Katete tarehe 15 Mei 2025.