Halmashauri Itaendelea Kubadilisha Mguu wa Ebeneza: Chaurembo

Imewekwa : August 14th, 2024

Na Benton Nollo, TTC 

Mkurugenzi wa Halmashauri ya Mji Tunduma, Mariamu Chaurebo amesema baada ya Rais Samia Suuhu Hassan, Rias wa Jamhuri ya muungano wa Tanzania kutimiza ahadi ya kumnunulia mguu wa bandia Ebeneza Mwakasyele (8) mwanafunzi wa Darasa la Tatu katika Shule ya Msingi Tunduma, Ofisi yake itahakikisha inabadilisha mguu huo kila muda utakapokuwa unahita mpaka mtoto huyo atakapotimiza miaka 18.

Chaurembo ameyasema hayo ofisini kwake tarehe 13 Agosti, 2024 baada ya Mwanafunzi huyo kupatiwa matibabu ya mguu bandia kufuatia ahadi iliyotolewa na Rais wa Jamhuri ya Muungano wa Tanzania, Mhe. Samia Suluhu Hassan kupitia ofisi yake kugharamia matibabu ya Mguu wa Bandia kwa Mwanafunzi huyo baada ya kumuona akiwa miongoni mwa Wananchi waliojitokeza kumsikiliza katika mkutano wake uliofanyika Kata ya Uwanjani Tunduma mjini tarehe 18 Julai 2024, akiwa njiani kuelekea Mbeya akitokea mkoani Rukwa alikokuwa na ziara ya kikazi.  

“Ibeneza amepatiwa matibabu yote anayostahili na kama ambavyo Mheshimiwa Rais alivyoelekeza, kwa hivi sasa tuo tayari kumkabidhi shuleni ili aweze kuendelea na masomo yake…aidha, nimshukuru sana Rais wetu kwa moyo wake wa upendo wa kujali Wananchi wake na kuona ipo haja kumsaidia mtoto huyu, tunamuombea maisha marefu na Mwenyezi Mungu aweze kumbariki alichotoa na amuongezee zaidi.” Amesema Chaurembo na kuongeza;   

“Binafsi nimekubaliana na wenzangu (Menejimenti) kuwa ili azma ya Mheshimiwa Rais itimie kwa ukamilifu na uendelevu wake, nimeandika barua kwa Wakurugenzi wenzangu watakaofuata katika Halmashauri hii kutekeleza maelekezo ya kumnunulia mguu mtoto huyo pale itakaohitajika kwa kuwa anakua hivyo huenda kukawa na haja ya kufanya hivyo kwa kadiri madaktari watakavyoshauri.

Ebeneza alizaliwa tarehe 04 Septemba 2016 Mtaa wa Mwakakati Shina Moja katika Halmashauri ya Mji wa Tunduma mkoani Songwe katika familia ya Mzee Mwakasyele, ambapo alizaliwa bila ulemavu wowote.

Ebeneza alikatwa mguu mwaka 2019 akiwa na umri wa miaka minne (4) baada ya kuugua ugonjwa usiojulikana uliosababisha mguu kuanza kuvimba, kutoa malengelenge na kufanya ngozi ya mguuni kuanza kukauka ambapo alipelekwa Hospitali ya Wilaya ya Mbozi (Vwawa) ambako ilishauriwa apelekwe Hospitali ya Consolata iliyopo Ikonda mkoani Njombe na baada ya uchunguzi wa madaktari ilishauriwa akatwe mguu hali iliyomfanya kukosa amani hata aliokuwa akicheza na watoto wenzie.

Kwa upande wake Ebeneza amesema amepitia changamoto kubwa sana baada ya kukatwa mguu ikiwepo kushindwa kutembea licha ya kusaidiwa na wenzake alipohitaji msaada akiwa darasani, na wakati mwingine alihisi kunyanyapaliwa na jamii.

"Nilikuwa najisikia mpweke kutokana na hali ya kuwa tofauti na wenzangu lakini kaka yangu na wanafunzi wenzangu walikuwa wananisaidia sana pindi nilipokuwa nahitaji msaada." Amesema Ebeneza.

Hivyo, Ebeneza amemshukuru Rais Samia Suluhu Hassan kumnunulia mguu wa bandia ambao amemuahidi kusoma kwa bidii ili atimize ndoto zake za kimaisha.

Naye Mama Mzazi wa Ebeneza, Atwanukiye Sanga amesema Ebeneza amepitia changamoto kubwa sana kabla na baada ya kukatwa mguu kwani alikosa malezi ya baba yake ambaye walitengana mwaka 2019 baada ya mtoto wao kuanza kuumwa bila kujua hatima ya ugonjwa huo.

 “Baada ya kukatwa mguu huo mwanangu alikuwa mpweke sana nilichukua jukumu la kumpeleka Shule ya Msingi Tunduma, Kitengo cha watu wenye mahitaji maalumu ambapo kila siku nilikuwa nampeleka shuleni na kumrudisha nyumbani ili atimize ndoto zake za kielimu kwa kuwa ni haki yake ya msingi.” Amesema Sanga.

Amesema kutokana na changamoto hiyo alipofika Darasa la Kwanza alimtafutia gongo la mti alilodumu nalo mpaka Darasa la Pili ambapo Mbunge wa Jimbo la Tunduma, Mhe. David Silinde alimnunulia gongo la chuma alilolitumia mpaka Rais Samia alipotoa msaada wa kumnunulia mguu wa bandia.

“Namshukuru sana Rais Samia kwa msaada wa kumnunulia mguu wa bandia mwanangu hali ambayo itamsaidia kuhudhuria masomo na kutimiza ndoto zake kimaisha kwani Ebeneza anatamani sana kuwa daktari bingwa,” Ameongeza Sanga.

Mwalimu Mkuu wa Shule ya Msingi Tunduma, Suzana Mwakibete amesema Ebeneza alianza shule Darasa la Awali mwaka 2021 Kitengo cha Wanafunzi wenye Mahitaji Maalumu ambao walikuwa 104, ambapo uhitaji wake ulikuwa mkubwa sana ukilinganisha na wenzake shuleni hapo kwani alikuwa anatambaa muda wote.

“Tunatarajia baada ya Ebeneza kupatiwa mguu ataondokana na changamoto ya kutembelea mguu mmoja na kuhudhuria masomo kikamilifu.” Amesema Mwakibete.

Matukio katika Picha:

Mkurugenzi wa Halmashauri ya Mji Tunduma, Mariam Chaurembo (aliyevaa miwani) akiwa katika picha ya pamoja na Mwanafunzi Ebeneza Mwakasyele (wa pili kushoto) baada ya kupatiwa matibabu ya Mguu wa Bandia. Wa kwanza kulia ni Mkuu wa Divisheni ya Afya, Ustawi wa Jamii na Shughuli za Lishe Halmashauri ya Mji Tunduma, Dkt. Sebastian Siwale, wa kwanza kushoto ni Mama Mzazi wa Ebeneza, Atwanukiye Sanga.

Mwanafunzi Ebeneza Mwakasyele kabla ya kupatiwa matibabu ya Mguu wa Bandia. (Picha zote na Julius Evandino).