HALMASHAURI YA WILAYA YA MASASI YAFANYA ZIARA YA KUJIFUNZA TUNDUMA

Imewekwa : January 20th, 2023

Viongozi wa Halmashauri ya Wilaya ya Masasi Mkoani Mtwara wamefunga safari na kuja katika Halmashauri ya Mji Tunduma lengo ni kujifunza jinsi ya kubuni vyanzo vya mapato na kutekeleza miradi ya maendeleo. Ziara hiyo imefanyika leo tarehe 20/01/2023 kwa kutembelea baadhi ya vyanzo vya mapato na miradi ya maendeleo ikihusisha Madiwani 41, Wataalamu 9 na Madereva 2

Mwenyekiti Halmashauri ya Wilaya ya Masasi Mhe. Ibrahimu Issa Chiputula amesema kuwa Baada ya kuona Halmashauri ya Mji Tunduma inafanya vizuri katika ukusanyaji mapato ndio maana Baraza la madiwani likaamua kuja kujifunza hapa Tunduma

“Tunawashukuru sana Halmashauri ya Mji Tunduma kwa kutupokea na kukubali kutuelekeza mbinu mnazotumia katika kubuni vyanzo vya mapato na kukusanya mapato Hongereni sana, huu ndio uzalendo wa kweli katika nchi yetu” alisema Mhe. Chiputula

Mhe. Chiputula aliendelea kueleza kuwa wao Wilaya ya Masasi wanatarajia kuanzisha shule ya Msingi ya Mchepuo wa Kiingereza na Mwanga sasa wameupata na wanaenda kuufanyia kazi ili waweze kuongeza mapato ya Halmashauri ya Wilaya ya Masasi

Kwa upande wake Mwenyekiti wa Halmashauri ya Mji Tunduma Mhe. Ayubu Itlan Mlimba aliwapongeza sana Madiwani na Wataalamu wa Wilaya ya Masasi kwa kuchagua kuja Tunduma kujifunza kwani Halmashauri zipo nyingi sana lakini wakaona wafike Tunduma

“Tunduma sasa tupo katika mchakato wa kuifanya kuwa Manispaa kwani vigezo vingi tumevifikia, nahii inasababishwa na ushirikiano wa dhati baina ya wataalamu na Baraza la madiwani katika kubuni vyanzo vya mapato na kukusanya mapato” alisema Mhe. Mlimba

Aidha mwenyekiti Mlimba alendelea kusema kuwa “Tunduma suala la mapato ni kipaumbele cha kwanza na wote tunaimba wimbo mmoja katika hili, ikitokea mwananchi amekiuka maadili ya ulipaji mapato wote tunaungana kumuelimisha na kumfanya atoe  tozo hizo na si kumkingia kifua asitoe” alisisitiza Mhe. Mlimba

Naye Mwenyekiti wa Kamati ya Uchumi, Elimu na Afya Mhe. Salumu Kiyambi aliwaelekeza Madiwani na wataalamu wa Halmashauri ya Wilaya ya Masasi kuwa kutokana na usimamizi mzuri wa makusanyo sasa Tunduma inatekeleza miradi mikubwa ya maendeleo kwa fedha za mapato ya ndani

“Sasa tunajenga miradi mikubwa mingi kwa mapato ya ndani mfano mmeiona Shule ya Msingi ya Ghorofa inayoitwa Haisoja iliyogharimu Milioni 829 yenye Madarasa 10, Ofisi 04 na Matundu ya vyoo 24 na Kituo cha Afya Chapwa chenye majengo nane (OPD, Maabara, Upasuaji, Mama na Mtoto, kufulia, Mochwari, kichomea taka na Nyumba ya mtumishi) kwa gharama ya milioni 640 tunajenga yote kwa kutumia mapato ya Ndani” alisema Mhe. Kiyambi

Halmashauri ya Wilaya ya Masasi wamefanya ziara ya siku moja ndani ya Mji wa Tunduma kwa kutembea Mpaka wa Tanzania na Zambia na kuona jinsi biashara za ujirani mwema zinavyofanyika kwa kutembelea Zambia na kuongea na baadhi ya viongozi na wafanyabiashara wa Nchini Zambia