'Hii Tunashinda kwa Kishindo'

Imewekwa : May 25th, 2025

Na Benton Nollo, TTC

Timu ya Halmashauri ya Mji Tunduma wilayani Momba inayokwenda kwenye mashindano ya Umoja wa Michezo na Taaluma kwa Shule za Msingi Tanzania (UMITASHUMTA) imeondoka leo tarehe 25 Mei 2025 kwenda wilayani Momba kwa ajili kushiriki mashindano hayo kwa ngazi ya Mkoa.

Akizungumza kwa niaba ya Mkurugenzi wa Halmashauri hiyo, muda mfupi kabla ya timu hiyo kuondoka, Afisa Elimu ya Awali na Msingi ambaye pia ni Makamu Mwenyekiti wa Kamati ya Maandalizi ya UMITASHUMTA ngazi ya Halmashauri, Casta Mbawala amesema Timu hiyo inaondoka ikiwa na jumla ya Wanafunzi 120 wanaokwenda kushiriki michezo mbalimbali pamoja na Walimu wao 12.

Mbawala amesema Timu hiyo inaondoka kwenda kushiriki michezo ya UMITASHUMTA Mkoa wa Songwe, baada ya kukaa kambini katika Shule ya Msingi Katete kujinoa kwa muda wa siku 5 ambapo Wanafunzi wamejiandaa vya kutosha na wana matarajio ya kupata makombe na zawadi kwa kushinda michezo hiyo.

"Michezo tunayokwenda kushindana ni mpira wa miguu kwa Wavulana na Wasichana, Mpira wa Pete, Mpira wa Mikono, Basket Ball (Mpira wa Kikapu)...kizazi kipya lakini pia Fani za ndani ambapo kuna Kwaya na Ngoma, michezo yote hiyo imeandaliwa vizuri." Amesema Mbawala na kuongeza;

"Watoto hawa tumeshawaandaa vizuri, Walimu wako imara tayari kwa michezo yao na tutakuwa kule kwa siku 4 kuanzia tarehe 26 hadi 29 Mei 2025 kwa mashindano ya Mkoa wetu wa Songwe ambayo yatafanyika katika Shule ya Sekondari Songwe Sunrise iliyopo wilayani Mbozi."

Aidha, Mbawala ametumia nafasi hiyo kumshukuru Mkurugenzi wa Halmashauri ya Mji Tunduma, Mariam Chaurembo kwa kuwezesha maandalizi mazuri ya vifaa pamoja na Walimu kwani kabla ya kuanza kambi, awali yalianza mashindano ya Kanda ambayo ndiyo yaliyotumika kuandaa Timu hiyo ya Halmashauri bila changamoto yoyote.

Kadhalika, Mbawala amewashukuru wadau na taasisi mbalimbali ambazo zimeshiriki kuchangia michango ya hali na mali kwa ajili ya kufanikisha zoezi hilo.

Mashindano ya UMITASHUMTA yalianzishwa rasmi na Serikali mwaka 1971 hadi mwaka 2000 yaliposimamishwa ili kuyaboresha na baadaye mwaka 2007 yalirejea tena mpaka sasa licha ya kuwa mwaka 2019 yariahirishwa kwa sababu ya mlipuko wa UVIKO 19.

Matukio katika Picha: