HONGERENI TUNDUMA UJENZI WA SHULE YA KISASA YA MFANO_DK. MSONDE

Imewekwa : September 9th, 2022

Naibu Katibu Mkuu Ofisi ya Rais TAMISEMI anayeshughulikia Elimu Dk. Charles Msonde leo Septemba 9 amefanya ziara katika Halmashauri ya Mji Tunduma ya kukagua ujenzi wa Shule ya Mkoa ya Wasichana, Namole iliyopo kata ya Chiwezi

Dk. Msonde alieleza kuwa Kutokana na agizo la Rais wa Jamhuri ya Muungano wa Tanzania Mhe. Samia Suluhu Hassan la Kujenga Shule ya wasichana ya Bweni kwa kila Mkoa, anaupongeza uongozi wa Mkoa wa Songwe kwa kutii agizo hilo na kuamua kutenga eneo Mtaa wa Namole kata ya Chiwezi  katika Halmashauri ya Mji Tunduma kwaajili ya ujenzi wa mradi huo ambao tayari unaendelea kutekelezwa

Mkoa wa Songwe ni miongoni mwa Mikoa kumi iliyopewa fedha kwaajili ya ujenzi wa Shule ya kitaifa ambapo tayari fedha za kuimarisha miundombinu ya shule hiyo kiasi cha shilingi bilioni tatu kati ya Bilioni nne zimetolewa na Serikali kupitia ofisi ya Rais TAMISEMI kama ilivyoelekezwa na Mhe. Rais Samia Suluhu Hassan.

Aidha Dk. Msonde aliendela kusema jambo lililomfanya kufika Songwe ni kuja kuona ujenzi wa shule ya Kisasa ambapo Halmashauri ya Mji Tunduma ilipeleka maombi Ofisi ya Rais TAMISEMI la kuongeza fedha kutoka mapato ya ndani na kuamua kujenga Shule ya Ghorofa tofauti na Mikoa mingine iliyopewa fedha kwa ajili ya ujenzi wa aina hiyo

 “Nimekuja kuona hayo Maghorofa ni yapi yanajengwa, yana uimara gani, yanajengwa vipi na je yatakamilika kwa wakati?”

Baada ya kujiridhisha na ujenzi huo unavyoendela Dk. Msonde ameupongeza sana uongozi wa Halmashauri ya Mji Tunduma na Mkoa wa Songwe kwa ujumla kwa hatua nzuri zilizofikiwa katika ujenzi huo.

“Nipende kukupongeza Msimamizi wa Mradi huu Mhandisi Dickson Kisenime kwa kazi kubwa na nzuri unayofanya ya usimamizi wa mradi pamoja na wasaidizi wako kwani kazi yenu inaonekana bora maana mmepambana na miamba lakini mmeiweza na kuhakikisha ujenzi unendelea eneo hili na mimi nimefurahi sana kwani kuwepo kwa miamba hiyo kutafanya Ghorofa kuwa imara, hongera sana”

Pia Dk. Msonde amesema atampelekea salamu Waziri wa OR – TAMISEMI Mhe. Innocent Bashungwa na atamuomba ikimpendeza yeye mwenyewe aje aifungue shule hiyo ya Mfano ya Ghorofa mwezi Novemba itakapokuwa imekamilika na Kudahili wanafunzi ifikapo mwezi Januari kama inavyotarajiwa na Serikali.

Mwisho Naibu Katibu Mkuu OR - TAMISEMI Dk. Msonde alishiriki ujenzi katika moja ya majengo yanayoendela kujengwa kama kuunga mkono juhudi zinazofanywa na Halmashauri ya Mji Tunduma