IMBEJU KUWANUFAISHA VIJANA NA WANAWAKE TUNDUMA

Imewekwa : July 1st, 2023

Na William Maganga - Tunduma TC

Benki ya CRDB imekuja na mtaji wezeshi kwa vijana na wanawake wa Tunduma ili kuwawezesha kiuchumi. Mkakati huo umezinduliwa leo katika ukumbi wa Tunduma sekondari TC huku mgeni rasmi akiwa katibu tawala wilaya ya Momba Bw. Frank Kinda, huku wahusika wakiwa ni vijana na wanawake. Akizungumza katika uzinduzi huo, meneja wa benki ya CRDB tawi la Tunduma Bw. Chrispin Kombo, amesema mkakati huo wameupa jina la” IMBEJU”, ikiwa na maana ya uvumbuzi na mbegu (maendeleo).

Aidha meneja huyo ameyataja makundi yatakayonufaika na mtaji wezeshi kuwa ni wafanyabiashara ya Samaki, machinga, vikundi vinginevyo, fursa online n.k.  Ameongeza kuwa mfumo huo umetengenezwa ili kurahisisha upatikanaji wa huduma za kibenki. Pia ametaja kuwa kiasi cha mtaji wezeshi unaanzia kiasi cha shilingi laki mbili (200,000) hadi Milioni Thelathini (30,000,000).

Katika uzinduzi huo Afisa maendeleo  wa mji wa Tunduma Bi.Mwanaisham Shemagembe   amesema katika 100% ya maendeleo ya Tunduma, kundi la wanawake limechangia 10%. Hivyo katika makusanyo ya mapato ya tunduma 2022/2023 yalofikia fedha za kitanzania billion 13. 10% ya fedha hizo zinarudishwa kwa wananchi, huku 4% kwa wanawake,4% kwa vijana na 2% kwa walemavu.

Katika hafla hiyo mgeni rasmi Bw.Kinda ameipongeza sana benki ya CRDB kwa kuja na mtaji wezeshi (imbeju) wenye lengo la kukuza uchumi na kipato kwa watanzania. Katika mkakati huo pia ametaja manufaa kwa walengwa kuwa ni Pamoja na kuwezeshwa akaunti maalumu ya imbeju Pamoja na bima ya Maisha.

Akitoa ufafanuzi Zaidi kwa walengwa wa mtaji wezeshi, afisa mahusiano wa benki ya CRDB, amesema waombaji ni wale waliopo kwenye vikundi vilivyosajiliwa. Pia ameelezea kuwa namna ya upatikanaji wa mtaji wezeshi kwa wanawake ni kupitia vikundi vyao na kwa vijana utafanyika kwa njia ya mtandao (online application).

Ameongeza pia kwa kutaja sifa ya kijana anayestahili mkopo huo sharti awe ni mtanzania, awe na umri kati ya miaka 18-40, awe tayari ameanzisha biashara iliyo halali na awe amefaulu mtihani wa uombaji wa mtandaoni(ICTC). Kwa upande wa upande wa wanawake sifa zao ni miaka 18-60, awe mwanachama wa kikundi kilichosajiliwa na biashara iwe halali pia inafanyika Tanzania.

Katika sharti la biashara ya kufanyika Tanzania Bi.Sarah Laurent aliuliza swali kuwa je,imbeju itamsaidiaje mtu anayefanyia biashara zake upande wa Zambia?. Afisa mikopo amemjibu kuwa kwa vile ni mtanzania na kikundi chake kipo Tanzania na amekopa Tanzania hivyo ana sifa ya kupata mkopo.

Katika hafla hiyo afisa mikopo Bw. Fedrick Mwasi amefafanua juu ya bima kwa wanufaika wa mkopo huo kuwa wanashikwa mkono katika biashara, ajali,ulemavu na kifo, ambapo mhusika akifariki mkono wa pole ni kati shilingi Million moja na nusu  hadi million kumi (1,000,000-10,000,000), akifiwa na mwenza ni kati ya millioni moja hadi millioni tatu (1,000,000-3,000,000)