Kikao cha Huduma za Lishe Chafanyika

Imewekwa : May 21st, 2025

Na Benton Nollo, TTC

Kamati ya Huduma za Lishe katika Halmashauri ya Mji Tunduma imefanya kikao chake cha kawaida kwa kipindi cha robo ya tatu ya mwaka wa fedha 2024/2025 kwenye Ukumbi mdogo wa Mikutano wa Halmashauri hiyo tarehe 21 Mei 2025.

Pamoja na mambo mengine, Kamati hiyo imepokea na kujadili taarifa ya utekelezaji wa Afua za Lishe katika kipindi hicho kwa Kitengo cha Huduma za Lishe, Divisheni ya Elimu Msingi na Awali, Diivisheni ya Elimu Sekondari, Divisheni ya Maendeleo ya Jamii na Divisheni ya Kilimo, Mifugo na Uvuvi.

Kuhusu matibabu ya  utapiamlo mkali, jumla ya watoto 13 wametibiwa katika kipindi hicho ambapo kwa upande wa huduma ya elimu ya namna nzuri ya kuimarisha lishe wakati wa ujauzito, unyonyeshaji na ulishaji watoto wachanga na wadogo imekuwa ukitolewa kila siku maeneo ya kliniki ya huduma za afya ya uzazi na mtoto ambapo watoto wachanga 7,716 wamepatiwa maziwa ya mama pekee ndani ya miezi 6.

Aidha watoto 32,409 walichukuliwa hali za lishe na walezi kupatiwa unasihi wa lishe ambapo baada ya uchunguzi, watoto 999 walikuwa na uzito pungufu kiasi na watoto 423 walikuwa na uzito pungufu sana, watoto 277 walikuwa na ukondefu kiasi na watoto 234 walikuwa na ukondefu sana.

Kuhusu utoaji wa vidonge vya madini chuma, katika kipindi hicho kati ya Wajawazito 11,483, Wajawazito 11,062 walihudhuria kliniki na kupatiwa vidonge hivyo ambapo walizaliwa watoto 2,368 na kati yao watoto 229 walikuwa na uzito wa chini ya kilo 2.5.

Kadhalika, kuhusu utoaji wa Matone ya Vitamini A na Dawa za Minyoo katika kipindi hicho watoto 11,410 wamepatiwa Vitamini A na watoto 3,475 wamepatiwa vitonge vya minyoo.

Maadhimisho ya Siku ya Afya na Lishe kwenye Mitaa, yamefanyika kwa Kata zote 15 na Mitaa yote 71 ambapo walezi 4,307 wenye watoto wenye umri wa miezi 0 - 23 walipatiwa unasihi, watoto 7,583 walipimwa mzunguko wa mkono - MUAC ambapo kati yao watoto 75 walikuwa na utapiamlo wa kadiri na watoto 2 walikuwa na utapiamlo mkali na walipatiwa rufaa kwenda kwenye vituo vya kutolea huduma ya matibabu ya utapiamlo mkali.

Matukio katika Picha: