KIKAO KAZI CHENYE TIJA KWA WATENDAJI WA KATA NA MITAA

Imewekwa : May 18th, 2022

Tunduma: watendaji wa kata na mitaa ya Halmashauri ya Mji wa Tunduma wamehudhuria kikao kazi cha siku moja ambacho kililenga kuwajengea uwezo na kuwawezesha kuendelea kutekeleza majukumu yao ya kila siku

Akiongea katika kikao kazi hicho Mkuu wa Divisheni ya Utawala na  Usimamizi wa Rasilimali watu Ndugu Josephat Kayombo amewakumbusha watendaji wa kata na Mitaa kutimiza wajibu wao katika kusimami kata na mitaa na kuonyesha mfano wa kuigwa katika kusimamia miradi ya maendeleo

“Kila Mtendaji ahakikishe anashiriki kikamilifu katika kuibua, kusimamia na kushiriki katika miradi ya maendeleo inayoendelea katika Mtaa wa kata husika, sitegemei kuona viongozi toka Halmashauri kuja kuhamasisha Wananchi kushiriki katika miradi ya maendeleo wakati Mtendaji wa Mtaa na kata husika upo”

Pia Bwana Kayombo aliwakumbusha kila Mtendaji wa Mtaa na Kata ahakikishe anaitisha vikao na kusoma Mapato na matumizi kwa wananchi ili waendelee kujua Michango wanayotoa inafanya kazi gani.

Pia miradi yoyote inayopelekwa na Serikali kuu au za mapato ya ndani wananchi wanatakiwa kuambiwa ili waijue na wajue kuwa inaletwa katika kuwasaidia mahitaji yao kwani miradi hiyo inatekelezwa kutokana na kodi wanazozitoa.

Naye Bwana Bakari Ibrahimu Kaimu Mkuu wa Idara ya Usafi na Usimamizi wa Taka, Katika suala la kusimamia Usafi amewakumbusha watendaji wa Mitaa na kata wote kuwa ni jukumu la kila mtu kuhakikisha mtaa wake na kata kwa ujumla iko safi. Wasimamie zoezi zima la uzoaji wa taka katika mitaa yao.

“Kila mtendaji wa mtaa anawajibika kuhakikisha mtaa wake unakuwa msafi kwa kuhamasisha wananchi kutunza taka na kuzitoa siku ya ratiba ya gari la taka kupita katika mtaa husika, wananchi wanapotupa taka barabarani au mitaani hovyo maana yake mtendaji wa mtaa husika hujatimiza wajibu wako”

Kwa upande wake Afisa Mapato wa Halmashauri ya Mji Bi. Dora Mbembela amewakumbusha watendaji kusimamia mapato katika kata na mitaa yao kwani kumekuwa na biashara nyingi ambazo zinaanzishwa huko mitaani au mapato mengi yanapita katika mitaa hivyo wanatakiwa kuhakikisha wanawazuia wote wanao torosha mapato.

“Ikumbukwe tumewapatia Mashine za Kutoza Ushuru (POS) ili mzitumie na mapato yake yaingie Benki kila siku”

Bi Dora aliendelea kusema kuwa kila mtendaji mwenye POS ahakikishe halali na pesa nyumbani badala yake pesa ipelekwe Benki na kuingizwa katika akaunti ya Halmashauri.

“Unapolala na pesa sheria hairuhusu, pia ulinzi wa pesa unakuwa mdogo au unaweza kushawishika kuzitumia na mwisho wa siku ukajikuta unapata matatizo kwa kuchukulia hatua za kisheria kwani unakuwa umekiuka misingi na taratibu, hivyo nawakumbusha sana kupeleka pesa benki”

Naye Afisa Utumishi na rasilimali watu Bwana Raphael Simkonda aliwakumbusha wajibu na majukumu wa watendaji wote katika utekelezaji wa kazi za kila siku.

Bwana Simkonda aliwaambia kuwa vibali vya ujenzi sasa vinagatuliwa kuja kwenu hivyo kuna utaratibu utaletwa wa kuunda kamati ili muweze kutekeleza jukumu hilo kwani wananchi ni wengi sana wanaoanza kujenga nyumba hivyo vibali vikitolewa huko itakuwa ahueni sana katika kuwapunguzia adha wanachi kuja Halmashauri

Pia aliwakumbusha kusimamia lishe katika mitaa yao.

“Katika kila vikao vyenu waelekezeni wananchi kuhusu lishe bora husani kwa watoto ili tuondokane na Utapiamlo pamoja na Udumavu wa watoto, ikumbukwe kuwa lishe bora ni vyakula tulivyonavyo majumbani sasa ni jinsi gani wavitumie ndio wengi hawajui hivyo nendeni mkawalekeze”

Mwisho Bwana Simkonda aliwakumbusha kuwa kila mmoja anatakiwa kuwa na mpango kazi wa wiki na anatakiwa kuusimamia ili kuleta matokeo chanya katika majukumu ya kila siku