Kikwete: Tunduma Mmetekeleza Maagizo ya Rais Samia

Imewekwa : February 25th, 2025

Na Benton Nollo, Tunduma TC

Waziri wa Nchi, Ofisi ya Waziri Mkuu - Kazi, Vijana, Ajira na Watu Wenye Ulemavu, Mhe. Ridhiwani Jakaya Kikwete (Mb) amesema Halmashauri ya Mji Tunduma imetekeleza maagizo ya Rais wa Jamhuri ya Muungano wa Tanzania, Mhe Dkt. Samia Suluhu Hassan kwa kutoa mikopo yenye thamani ya shilingi bilioni 4.6 kwa vikundi 150 vya Wanawake Vijana na Watu Wenye Ulemavu.

Waziri Kikwete ameyasema hayo baada ya kutembelea na kukagua Kikundi cha Vijana cha Ufugaji Kuku na Uuzaji wa Mayai cha Chipaka wakati wa ziara yake ya siku moja Halmashauri ya Mji Tunduma wilayani Momba aliyoifanya tarehe 25 Februari 2025.

Mhe. Kikwete amebainisha kuwa katika kuhakikisha mikopo hiyo inakuwa na tija kwa Walengwa, Mhe. Rais Samia alielekeza kusitisha utoaji wa mikopo hiyo na badala yake aliagiza mamlaka husika kupitia upya na kufanya maboresho ambapo baada ya mchakata huo kukamilika, dirisha la utoaji mikopo lilifunguliwa rasmi mwezi Septemba 2024.

"Mheshimiwa Rais Samia amezielekeza Halmashauri zote nchini kuanza kutoa mikopo hiyo kwa kutumia mfumo mpya wa utoaji na usimamizi wa mikopo hiyo na ninyi mmetekeleza kama kiongozi wetu alivyoagiza, homngereni sana." Amesema Waziri Kikwete.

Aidha, amesema Rais Samia Suluhu Hassan katika kipindi chake cha uongozi, amejitahidi kuhakikisha vijana wanafunguliwa fursa na kuwezeshwa, ambapo amekitaka Kikundi hicho pamoja na Wanufaika wengine kutumia fedha hizo kwenye miradi yenye tija na kurejesha kwa wakati ili vikundi vingine vinufaike na mikopo hiyo.

Mhe. Kikwete amempongeza Mbunge wa Jimbo la Tunduma, Mhe. David Silinde kwa kuhakikisha maono ya Mhe. Rais Samia yanatafsiriwa kwa vitendo na kuwaletea maendeleo Wananchi.

Naye, Mkuu wa Mkoa wa Songwe, Mhe. Daniel Chongolo amemshukuru Rais Samia kwa kuendelea kutekeleza miradi ya maendeleo katika mkoa huu hali inayo chochea mapato ambayo husaidia Halmashauri kupata mapato na kuweza kutoa mikopo ya Asilimia 10 kutokana na mapato ya ndani.

Kikundi cha Vijana Chipaka kilichopo Mtaa wa Nyerere Kata ya Chipaka kimeanzishwa mwaka 2021 na kina Wanachama sita kwa mwaka 2024/2025 kimekopeshwa shilingi milioni 90 kwa ajili ya mradi wa kufuga na kuuza mayai.

Matukio katika Picha:

Picha zote juu ni Waziri wa Nchi, Ofisi ya Waziri Mkuu - Kazi, Vijana, Ajira na Watu Wenye Ulemavu, Mhe. Ridhiwani Jakaya Kikwete (Mb) alipotembelea na kukagua Kikundi cha Vijana cha Ufugaji Kuku na Uuzaji wa Mayai cha Chipaka wakati wa ziara yake ya siku moja Halmashauri ya Mji Tunduma wilayani Momba aliyoifanya tarehe 25 Februari 2025.

Picha zote juu ni Waziri wa Nchi, Ofisi ya Waziri Mkuu - Kazi, Vijana, Ajira na Watu Wenye Ulemavu, Mhe. Ridhiwani Jakaya Kikwete (Mb) akisalimiana na Viongozi na Watumishi mbalimbali mara baada ya kuwasili Halmashauri ya Mji Tunduma, kutembelea na kukagua Kikundi cha Vijana cha Ufugaji Kuku na Uuzaji wa Mayai cha Chipaka wakati wa ziara yake ya siku moja katika Halmashauri hiyo iliyopo wilayani Momba aliyoifanya tarehe 25 Februari 2025.

Matukio katika picha ni Waziri wa Nchi, Ofisi ya Waziri Mkuu - Kazi, Vijana, Ajira na Watu Wenye Ulemavu, Mhe. Ridhiwani Jakaya Kikwete (Mb) alipotembelea na kukagua Kikundi cha Vijana cha Ufugaji Kuku na Uuzaji wa Mayai cha Chipaka wakati wa ziara yake ya siku moja Halmashauri ya Mji Tunduma wilayani Momba aliyoifanya tarehe 25 Februari 2025. (Picha zote na Benton Nollo).