KINANA AFANYA ZIARA YA UKAGUZI WA MIRADI YA MAENDELEO TUNDUMA

Imewekwa : July 27th, 2022

Makamu Mwenyekiti wa Chama Cha Mapinduzi (CCM) Mhe. Abdulrahman Kinana leo Julai 27 amewasiri katika viwanja vya Halmashauri ya mji Tunduma kwa lengo la kuzugumza na Wanachama wa Chama Cha Mapinduzi CCM sambamba na zoezi la ukaguzi wa miradi ya maendeleo kikiwemo Kituo cha afya katika kata ya Chapwa Tunduma na miradi mbalimbali katika Wilaya ya Momba kwa ujumla.

Mapokezi ya msafara huo yalikuwa makubwa kwani wanachama wazalendo wa Chama Cha Mapinduzi (CCM) walionekana kufurahishwa na tukio hilo la makamu mwenyekiti wa chama hicho kwa kuacha shughuli zake na kuamua kuja katika Halmashauri ya Tunduma kuzungumza na wanachama wake.

Akizungumza wakati wa ziara hiyo mara tu alipofika katika eneo la mradi wa Kituo cha afya kilichopo kata ya Chapwa Tunduma Makamu mwenyekiti wa Chama Cha Mapinduzi aliupongeza Uongozi wa Halmashauri ya Mji Tunduma na Wananchi kwa namna walivyo shiriki kikamilifu katika ujenzi wa mradi huo pamoja na mingineyo iliyotajwa na Mbunge wa Jimbo hilo na kuwaomba wananchi wasichoke kutoa ushirikiano kwa viongozi wao pale wanapohitaji ushirikiano wao kwani Serikali ya Rais Samia Suluhu Hassan inatekeleza yale iliyo yaahidi kwa wananchi wake.

Upande wake Naibu Waziri ambaye pia ni Mbunge wa Jimbo la Tunduma Mhe. David Silinde aliongeza kwa kuishukuru serikali ya Rais Samia Suluhu Hassan kwa juhudi zake katika utekelezaji wa miradi ya maendeleo katika Jimbo lake

Pia alisema kuwa Halmashauri ya Tunduma imefanikiwa kujenga shule za sekondari zaidi ya moja katika kila kata na shule mojawapo imejengwa kwa takribani shilingi Billion moja, pamoja na Ujenzi wa vituo vitano vya afya katika kata ya Chawa, Mpemba, Mwakakati, Chipaka na Chiwezi vingine bado vikiwa bado vinaendelea kumalizika.  

Sambamba na hilo Halmashauri ya Mji Tunduma imekamilisha ujenzi wa mabweni ya shule za msingi likiwemo bweni la Walemavu katika Shule ya Msingi Tunduma na Shule ya Msingi Katete sambamba na ujenzi wa madarasa katika shule za Msingi na Sekondari.

Naye Diwani wa kata ya Chapwa Amos Siame alipata nafasi ya kuzungumza ambapo alianza kwa  kuishukuru Serikali ya Awamu ya Sita kwa mchango mkubwa iliyotoa kufanikisha utekelezaji wa miradi ya maendeleo iliyokamilika na inayoendelea kutekelezwa.

Pia aliwataka wananchi wa Tunduma kuendelea kuiamini serikali na viongozi waliowachagua kuwatimizia mahitaji yao kwani wanafanya yale waliyoagizwa na wananchi na si kwa matakwa yao.