KUFIKA MWAKA 2025 TUNATAKA UNYWAJI WA MAZIWA TUNDUMA UFIKE 60% _MWALUKASA

Imewekwa : March 15th, 2023

Halmashauri ya Mji Tunduma imegawa jumla ya lita 500 za maziwa sawa na pakiti 2000 zenye thamani ya shilingi 1,000,000/= kwa wanafunzi wa shule za Msingi.

Jumla ya wanafunzi 2000 wa Shule ya Msingi Mapande na Katengele wamepatiwa maziwa hayo Ikiwa ni mwendelezo wa kampeni ya kuongeza ufaulu wa wanafunzi kupitia unywaji wa maziwa.

Shirika la Afya Duaniani (WHO), linapendekeza kila mtu anywe angalau lita 200 za maziwa kwa mwaka ingawa wastani kwa dunia ni lita 108.

Tanzania ni miongoni mwa nchi 10 zinazokabiliwa na changamoto ya kuwa na watoto wenye udumavu, ugojwa ambao unachangiwa kwa kiwango kikubwa na lishe duni wanazozipata watoto walio chini ya miaka mitano. Sababu kubwa inayofanya watoto hao kudumaa ni ukosefu wa vyakula vyenye virutubisho mwilini. Maziwa yana virutubisho vyote muhimu kwa ujenzi wa afya ya binadamu kwani yana protini ya daraja la kwanza, mafuta, madini, vitamin na sukari ya asili ya lactose na maji.

Jambo hilo linaifanya Halmashauri ya Mji Tunduma kuingia kwenye kampeni ya kuhamasisha unywaji wa maziwa kwa shule za msingi na Sekondari zote. Kampeni hii inaongozwa na Mkuu wa Divisheni ya Kilimo, Mifugo na Uvuvi Ndugu Lusajo Mwalukasa ambaye sasa anazunguka na walaamu wa Divisheni yake katika shule mbalimbali huku akitoa elimu juu ya unywaji wa maziwa huku wakigawa maziwa kwa wanafunzi hao

“Tunataka walau unywaji wa maziwa ufikie asilimia 60, watu waone umuhimu wa kunywa maziwa kwa sababu ni muhimu kwa afya zao, ndio maana tumeona tuanze na wanafunzi ili wawe mabalozi wazuri katika kuwaelimisha wazazi juu ya unywaji wa maziwa majumbani mwao” anasema Lusajo Mwalukasa

Naye Mwalimu Mkuu wa Shule ya Msingi Mpande, Josephat Makange anasema uamuzi wa Halmashauri kufanya kampeni ya unywaji maziwa unapaswa kuungwa mkono na wadau wengine ikiwamo Mashirika, taasisi na wafanyabiashara, ili kuwakumbusha wazazi kujenga utamaduni wa kununua maziwa kwa kuzingatia mahitaji ya watoto.

Baadhi ya wanafunzi wanakiri kuwa wengi wao hawajawahi kunywa maziwa wakiwa nyumbani.

“Nyumbani huwa sinywi maziwa kabisa kwa sababu wazazi hawaoni umuhimu huo ila wakielimishwa wanaweza kuanza kununua hata mara mbili kwa wiki,” anasema mwanafunzi Isaya Mwashiuya.

Mtaalamu wa Lishe wa Halmashauri ya Mji Tunduma Bwana Jonas Kamala anasema umuhimu wa maziwa mwilini ni mkubwa hasa kutokana na virutubisho vilivyopo. Anasema maziwa yanaweza kumfanya mtu kuwa na meno imara yanayong’aa, ngozi nyororo na ng’avu pia na uwezo wa kuzuia wadudu wasiingie mwilini pia maziwa yana madini ya Calcium yenye kazi kubwa ya kujenga mifupa na meno.

“Kwa hiyo uimara wa meno na mifupa hutegemea pia unywaji wa maziwa, ni vizuri familia kujiwekea mkakati wa kila mtu kupata maziwa,” anasema.

Anasema maziwa pia yana vitamini ‘D’ kwa wingi ambayo inaweza kupatikana kwa kuota jua hasa wakati wa asubuhi. Vitamin D inayopatikana kwenye maziwa husaidia utengenezwaji wa kichocheo cha Serotonin kinachohusisha masuala ya ‘mood’. Unaweza kupata hamu ya kula, kulala na wakati mwingine unywaji wa maziwa unaweza kupunguza uchovu na kumpa mtu raha.

Bwana Kamala anasema maziwa mazuri zaidi ni yale yatokanayo na wanyama kwani yana protini inayopatikana kwa kiwango cha hali ya juu.

Mtaalamu mwingine wa lishe Meckson Mandela anasema unywaji huo wa maziwa haupaswi kupita kiasi.

“Kunywa maziwa kiwango kile kinachotakiwa mwilini, usinywe maziwa mengi hasa krimu kwa sababu unywaji huo unaweza kukusababisha uzito kupita kiasi,” anasema Bwana Mandela