KUOKOA MAISHA YA WANADAMU NI KUJIWEKEA THAWABU KWA MWENYEZI MUNGU _ Sheikh Mkuu

Imewekwa : November 4th, 2022

Sheikh Husein Isa Batuza Sheikh wa Mkoa wa Songwe alihamasisha waumini kujitolea damu siku ya Ijumaa 04 Novemba 2022, akiongea juu ya waumini kujitolea damu alisistiza umuhimu wa kujitolea damu kwa ajili ya mahitaji mbali mbali yakiwemo akina mama wanaojifungua waathirika wa ajali mbali mbali na wagonjwa

“Ninawaasa ndugu zangu Waislamu juu ya kujitolea damu kwa ajili ya kuokoa Maisha ya ndugu zetu wengi wenye matatizo mbalimbali, kufanya hivi ni kupata thawabu mbele za Mwenyezi Mungu” alisema Sheikh Batuza

Mtaalamu wa maabara kutoka kituo cha Afya Tunduma Charle Karasa aliwaambia waumini wa Kiislamu kwamba hakuna kiwanda cha damu duniani isipokuwa kiwanda cha damu ni Binadamu mwenyewe na wala sio mnyama wa kufugwa au mnyama wa porini wala sio ndege wa kufugwa au ndege wa porini na wala sio samaki au mnyama wa baharini kwa sababu hao wote damu zao haziingiliani na damu ya binadamu

Bwana Charles alitoa elimu hiyo na kuwaomba watu kujitolea damu ili kunusuru wahanga mbali mbali wakiwemo akina mama wanaojifungua wakati wanapohitaji kuongezewa damu

“Ninawashukuru sana waumini wote kwa kuuona umuhimu huu wa kujitolea damu kwa ajili ya kuokoa Maisha ya wanadamu wengi, kufanya hivi ni kunusuru vifo vingi hususani kina mama wajawazito na Watoto” alisema Mtaalamu Charles

Nae Mjumbe wa Baraza la Masheikh Wilaya ya Momba Sheikh Abdulah Alito aliwapongeza sana waumini kwa majitoleo yao ya damu katika kuokoa Maisha ya wanadamu hapa Tunduma. Shekh Alito alisema baada ya kupokea barua toka Kituo cha Afya Tunduma inayomba uhamasishaji wa kuchangia Damu, Uongozi wa kiislamu ulikubali na kuwaomba waje tarehe 04 Novemba kwa ajili ya zoezi hilo.

“Tumeomba wataalamu hawa wad amu salama waje tena Ijumaa tarehe 12 Nobemba 2022 kwani tunaendelea kutoa hamasa kwa waumini wetu na wengine ambao hawakufika leo ili tuchangie damu kwa wingi Zaidi nia yetu ni kuokoa Maisha ya Binadamu wenzetu hususani kinamama wajawazito na Watoto” alisema Sheikh Alito

Kutoka Ustawi wa jamii Tunduma ndugu Frida Herman Msuya akiongea na waumini akina mama wa Msikiti Mkuu Masjid Jamaa (BAKWATA) Tunduma alisisitiza umuhimu wa kujitolea damu kwa sababu wahitaji wakuu wa kwanza wa kuongezewa damu ni akina mama wenyewe wakati wa kujifungua na waathirika wa majanga mbali mbali ambapo akina mama na watoto ni wahanga namba moja

“Nawaomba sana zoezi la kujitolea damu kwetu liwe endelevu kwa sababu hakuna kiwanda cha kutengeneza damu duniani hivyo viwanda hivyo ni sisi wenyewe binadamu, na ukijitolea damu ujue umejiwekea Hazina yako muda wowote kwani majanga huwa hayana hodi” alisisitiza Bi. Frida

Waumini mbali mbali walijitolea damu baada ya elimu kutolewa na waumini kuelimika juu ya umuhimu wa kujitolea damu