LISHE BORA NI MSINGI WA AFYA KWA WANANCHI WA TUNDUMA_DC LULANDALA

Imewekwa : November 5th, 2022

Mkuu wa Wilaya ya Momba Mhe. Fack Lulandala ameyasema hayo wakati akitia saini  Mkataba wa Lishe na Mkurugenzi wa Halmashauri ya Mji Tunduma Philemon Magesa na Watendaji wa kata zote za Tunduma

Pia Mhe. Lulandala alisema kwa hali ya kawaida tutakuwa tunachekesha katika taifa kuwa Halmashauri ya Mji Tunduma tunakuwa na Lishe duni wakati kila aina ya chakula ipo na wananchi wake wanaweza kupata chakula bila shida tofauti na maeneo mengine

Malengo makuu ya mkataba wa lishe ni;

• Lengo kubwa ni kufanikisha suala la kuboresha hali ya lishe na kupunguza athari za utapiamlo katika Wilaya.
• Kuhakikisha kuwa Halmashauri inasimamia ipasavyo utekelezaji wa  afua za lishe. 
• Kuchukua hatua madhubuti za kupunguza hali duni ya lishe katika Mkoa.
• Kupanga, kutenga na kutoa fedha zote kwa ajili ya kutekeleza afua za lishe katika mipango ya Wilaya na Halmashauri kwa mujibu wa miongozo na maelekezo ya Serikali.
• Kutoa taarifa ya utekelezaji kila robo mwaka kwa mujibu wa utaratibu uliowekwa.

Vipaumbele vya Halmashauri katika Afua za lishe ni;

• Kusimamia na kuhakikisha kuwa fedha kwa ajili ya afua za lishe zinapangwa, zinatengwa na kutolewa ndani ya Halmashauri kwa mujibu wa miongozo iliyopo.
• Kusimamia na kuhakikisha kuwa fedha zilizotolewa kwa ajili ya utekelezaji wa afua za lishe zinatumika kama ilivyopangwa.
• Kusimamia na kuhakikisha kuwa kunakuwepo na Mpango Jumuishi wa Lishe katika Idara zote ndani ya Mkoa na Halmashauri.
• Kusimamia na kuhakikisha kuwa watoto wenye umri kuanzia miezi 6 hadi miaka 5 wanapatiwa nyongeza ya matone ya Vitamini A kwa mujibu wa utaratibu.
• Kusimamia na kuhakikisha kuwa Wanawake wajawazito wanapatiwa vidonge vya Madini Chuma na Vitamini ya Foliki Asidi kwa mujibu wa utaratibu.
• Kusimamia na kuhakikisha kuwa akinamama wenye watoto walio na umri chini ya miezi 6 wanapatiwa elimu ya unyonyeshaji wa maziwa ya mama pekee kwa muda wa miezi 6.
• Kusimamia na kuhakikisha kuwa akinamama wenye watoto walio na umri wa miezi 6 hadi miaka 2 wanapatiwa elimu ya ulishaji wa vyakula vya nyongeza.
• Kusimamia na kuhakikisha kuwa watoto wenye utapiamlo mkali wanapatiwa matibabu katika vituo vya kutolea huduma za afya pindi wanapogundulika.
• Kusimamia na kuhakikisha kuwa Vikao vya Kamati za Lishe za Halmashauri zinafanyika chini ya Usimamizi wa Wakurugenzi wa Halmashauri kwa ngazi ya Halmashauri.
• Kusimamia na kuhakikisha kuwa ukaguzi wa ubora wa chakula, dawa pamoja na upimaji wa uwepo wa Madini Joto kwenye Chumvi unafanyika katika maeneo yenu kwa mujibu wa utaratibu.
• Kusimamia na kuhakikisha kuwa shule za Msingi na Sekondari zinatoa chakula kwa wanafunzi kwa mujibu wa mwongozo.
• Kusimamia na kuhakikisha kuwa Siku ya Afya na Lishe ya Kijiji/Mtaa inaadhimishwa katika maeneo yenu kwa mujibu wa mwongozo.
• Kusimamia na kuhakikisha kuwa chumvi zinazozalishwa na kuliwa katika maeneo yote zinawekewa au kuwa na madini joto ili kuzuia na kudhibiti magonjwa yatokanayo na upungufu wa madini joto mwilini.
• Kusimamia na kuhakikisha ufuatiliaji, usimamizi na tathmini ya utekelezaji wa Afua za Lishe unafanyika kwa mujibu wa miongozo.

Naye Afisa Lishe wa Halmashauri ya Mji Tunduma alisema Halmashauri inakabiliwa na changamoto ya hali ya lishe duni. Kulingana na takwimu za kitaifa zinaonyesha kua hali ya udumavu kwa mkoa wa Songwe ni 43.3%, ambayo kimsingi ni kiashiria cha uwepo wa utapiamlo kwa kiwango kikubwa.

Naye Mkurugenzi wa Halmashauri ya Mji Tunduma Ndugu Philemon Magesa amesema kuwa Halmashauri tayari ina sheria ya chakula katika shule zote hivyo kuanzia mwezi januari shule zote zitakuwa zinatoa chakula ili kukabiliana na swala la lishe duni kwa Watoto

“Kwa kusaini mikataba hii ni imaniyangu kuwa itaongeza chachu na ari ya kupambana na lishe duni pia kusimamia makubaliano ya kutoa elimu kwa wananchi ili wawe na uelewa juu ya lishe” alisema Mkurugenzi Magesa