MACHINGA TUNDUMA KUFANYA BIASHARA HADI USIKU

Imewekwa : November 18th, 2022

Mkurugenzi wa Halmashauri ya Mji Tunduma Ndugu Philemon Magesa amesema hayo wakati akiwaonyesha eneo la kufanyia biashara Machinga kwa muda wakati wanasubili ujenzi wa Soko lao kubwa na la kisasa linaloendelea kujengwa

Mkurugenzi Magesa amesema kuwa Halmashauri kazi yake ni kutengeneza mazingira rafiki kwa wafanyabiashara wadogo (Machinga) ili waendeleee kutoa Huduma kwa wananchi

“Tumeona tuwapatie hili eneo lililokuwa Stendi ya Mabasi zamani ili mlitumie kwa kutoa Huduma zenu, hapa ni sehemu ambayo inafikika kwa wateja, pia eneo hili ndipo panapojengwa soko lenu la kisasa hivyo mkiwa karibu mtakuwa mnaona mendeleo ya Ujenzi” alisema Mkurugenzi Magesa

Mkurugenzi Magesa aliendelea kusema kuwa

“Kutokana na suala la Ulinzi soko hili tayari tumelifunga taa hivyo biashara zitafanyika hadi usiku kwa maana hiyo wafanyabiashara wote mtakuwa mnapata Wateja muda wote tangu asubuhi hadi Usiku pia eneo hili tumeona pawe na Kituo cha Daladala ili wateja waweze kuja na kuondoka kwa urahisi” alisema Mkurugenzi Magesa

Akiongea wakati wa kukabidhiwa eneo hilo Mwenyekiti wa Machinga Bwana Justin Kashililika ameipongeza sana Serikali ya Awamu ya Sita ya Jamhuri ya Muungano wa Tanzania inayo ongozwa na Rais Mhe. Samia Suluhu Hassan kwa kutengeneza mazingira bora kwa wamachinga Tunduma na Tanzania kwa ujumla

“Tunaishukuru sana Halmashauri ya Mji Tunduma kwa kutuwezesha Sisi Machinga kufanya Kazi katika maeneo rafiki na yenye wateja, kiukweli kila tunapopata changamoto tukimshirikisha Mkurugenzi lazima aitatue pasipo na shida tena kwa kukaaa mezani na kukubaliana” alisema Kashililika

Eneo hili linaenda kukaa Machinga zaidi ya 1,047 ambao watakuwa na Meza za kuuzia bidhaa zao

Wakiongea baadhi ya Machinga wamesema sasa Machinga wote wanaokaa barabara wanatarajiwa kuhamia hapa kwenye Soko lenye miundombinu yote kama Stendi, Choo na Taa kwa ajili ya kufanyia Biashara.