Madaktari Bingwa wa Dkt. Samia Wawasili Tunduma

Imewekwa : May 26th, 2025

Atwiya Mohamed na Silvesta Mtafya, TTC

Halmashauri ya Mji Tunduma tarehe 26 Mei 2025 imepokea Madaktari Bingwa wa Dkt. Samia sita ambalo watakuwepo katika Hospitali ya Mji Tunduma iliyopo Mpemba ikiwa ni kambi maalum kwa ajili ya kutoa huduma ya matibabu ya kibingwa kwa Wananchi wa Tunduma kuanzia tarehe 26 hadi tarehe 31 Mei 2025.

Akizungumza wakati wa mapokezi ya Madaktari hao Kaimu Mkurugenzi wa Halmashauri ya Mji Tunduma, Wakili Glory Mlimba amesema ujio wa Madaktari hao ni faraja kubwa kwa Wananchi kwani Serikali imewasogezea huduma hiyo muhimu ambapo pia pamoja na kutoa huduma ujio wa Madaktari hao utasaidia kuwaongezea ujuzi Madaktari waliopo katika Hospitali hiyo.

“Nitumie nafasi hii kutoa wito na kuwakaribisha Wananchi wote wa Halmashauri ya Mji Tunduma kujitokeza kwa wingi kutumia fursa hii kupata huduma za kibingwa ambazo zitatolewa katika Hospitali yetu ya Mji iliyopo pale Mpemba.” Amesema Wakili Mlimba. 

Naye, Kiongozi wa Timu ya Madaktari hao, Daktari Mkunga Mbobezi, Dkt. Mary Sapali amesisitiza wakazi wa Mji wa Tunduma wanajitokeza kwa wingi ili kuweza kufaidika na uwepo wa Madaktari hao kwani ni fursa muhimu nay a kipekee.

Kambi hii ya Madaktari bingwa inafanyika katika Halmashauri hiyo kwa mara ya tatu ikiwa ni mfululizo wa utekelezaji wa maelekezo ya Rais Dkt. Samia Suluhu Hassan Suluhu ya kuhakikisha Wananchi wanasogezewa huduma bora za afya katika maeneo yao ili wasitumie gharama kubwa na umbali mrefu kufuata huduma hizo.

Huduma za kibingwa zitakazotolewa na Madaktari hao ni pamoja na magonjwa ya wanawake, magonjwa ya watoto, upasuaji, mfumo wa mkojo, Usingizi na ganzi, magonjwa ya ndani, afya ya kinywa na meno pamoja na mifupa na ajali.

Matukio katika Picha: