Madiwani Ziarani Kahama na Mwanza

Imewekwa : December 5th, 2023

Na Benton Nollo, Tunduma TC

Waheshimiwa Madiwani wa Halmashauri ya Mji Tunduma wamefanya ziara  katika Halmashauri ya Manispaa ya Kahama mkoani Shinyanga na Halmashauri ya Jiji la Mwanza kwa lengo la kubadilishana uzoefu ili kuboresha utoaji wa huduma bora kwa Wananchi wa Tunduma na kuongeza ufanisi katika utekelezaji wa miradi ya maendeleo.

Ziara hiyo ya siku mbili ambayo imefanyika kwa nyakati tofauti tarehe 27 na 28 Novemba 2023 kwanza imelenga kujifunza masuala ya ukusanyaji wa mapato, pili udhibiti wa taka ngumu, tatu uhifadhi wa mazingira na nne ni usimamizi jadidi katika utekelezaji wa miradi ya maendeleo.

Akizungumza mara baada ya kuwasili katika Halmashauri ya Manispaa ya Kahama, Mwenyekiti wa Halmashauri ya Mji Tunduma, Ayubu Mlimba amesema pamoja na kwamba Halmashauri hiyo ina mapato makubwa uongozi umeona ni vema kwenda kujifunza ili kuongeza ufanisi zaidi katika ukusanyaji wa mapato lakini pia kuboresha utoaji wa huduma kwa Wananchi wa mji wa Tunduma.

“Viongozi wenzangu pamoja na kwamba Halmashauri yetu ina mapato makubwa, tumeona ipo haja ya kuja kwenu kujifunza mbinu na mikakati mnayoitumia katika ukusanyaji wa mapato ili na sisi tukaongeze juhudi na ili tufanye vizuri zaidi.” Amesema Mlimba.

Kwa upande wake Mkurugenzi wa Halmashauri ya Mji Tunduma, Philemon Magesa amesema amejifunza namna Waheshimiwa Madiwani wa Manispaa ya Kahama wanavyoshirikiana na Wataalam na kuheshimu mipango inayotokana moja kwa moja na mawazo ya Wananchi.

“Nimejifunza wenzetu wanafanikiwa sana kwa sababu wanaheshimu mawazo yanayotokana na Wananchi…mipango yetu itokane na mawazo ya Wananchi…sis tupo hapa juu, Madiwani na Wataalam, sawa tunapanga lakini tunachokipanga lazima kitokane na Wananchi juu ya kile wanachokifikiria na kukihitaji ili kupata mpango wa maendeleo, tusitekeleze mipango ya maendeleo kutokana na jinsi tunavyoona kama Wataalam na Madiwanii bila kuwashirikisha Wananchi.” Amesema Magesa na kuomngeza:

“Wenzetu wana mradi ya Kimkakati wa bilioni 27 wa Ujenzi wa Hospitali ya Manispaa kwa awamu awamu huku mapato yao ya ndani katika miradi ya maendeleo ni bilioni 3 tu, lakini sisi hatuna miradi kama hiyo na tuna bilioni 7 za mapato ya ndani katika miradi ya maendeleo, tumetawanya fedha kwenye miradi midogo midogo ambayo huwezi kuona ufanisi wake katika jamii…hii maana yake wenzetu wanakubaliana…hili ni fundisho kwetu.”

Naye Mkurugenzi wa Manispaa ya Kahama, Anderson Msumba amesema siri kubwa ya mafanikio katika ukusanyaji wa mapato na utekelezaji wa miradi ya maendeleo ni ushirikiano mkubwa uliopo kati ya Waheshimiwa Madiwani na Wataalam.

“Sisi tulikaa tukakubaliana kuwa na miradi ya kimkakati licha ya kwamba mapato yetu ni kidogo…tuliwashirikisha Wananchi na tukaweka mazingira wezeshi kwao na tukafanikiwa…sasa hivi tunajenga Hospitali ya Manispaa kwa awamu ya bilioni 27 kwa mapato ya bilioni 3 kwa mwaka.” Amesema Msumba.

Aidha, katika siku ya pili ziara hiyo imefanyika katika Halmashauri ya Jiji la Mwanza ambapo Waheshimiwa Madiwani pamoja na Wataalam wamejifunza namna Halmashauri hiyo inavyokusanya mapato, namna ya kubuni vyanzo vipya vya mapato, ukusanyaji wa mapato na jinsi mapato hayo yanavyotumika kutoa huduma kwa jamii na utekelezaji wa miradi ya uwekezaji ambayo hugeuka kuwa vyanzo vya mapato.

Matukio katika Picha: