Majukwaa 15 ya Uwezeshaji Wanawake Kiuchumi Yahuishwa Tunduma

Imewekwa : November 9th, 2023

Na Benton Nollo, Tunduma TC

Divisheni ya Maendeleo ya Jamii Halmashauri ya Mji Tunduma leo tarehe 09 Novemba 2023 imehitimisha rasmi zoezi la Uhuishaji wa Majukwaa ya Uwezeshaji Wanawake Kiuchumi ambali limefanyika katika Kata zote 15 za Halmashauri hiyo.

Akizungumza katika Mkutano wa Wanawake Kata ya Majengo iliofanyika kwenye Ukumbi wa Soko la Machinga mjini Tunduma leo tarehe 09 Novemba 2023, Mratibu wa Dawati la Uwezeshaji Wananchi Kiuchumi wa Halmashauri ya Mji Tunduma, Edward Mbembela amesema lengo la Majukwaa hayo ni kuwakutanisha wanawake ili waweze kujadili fursa za kiuchumi na changamoto mbalimbali wanazokutana nazo wakati wa utekelezaji wsa shughuli za kiuchumi nchini.

Mbembela ametaja malengo mahsusi ya majukwaa hayo ni kuwakutanisha Wanawake wote katika ngazi zote za jamii ili kujadili fursa, changamoto na jinsi ya kushiriki katika shughuli za kiuchumi hususan biashara, kilimo, uchukuzi, usindikaji wa maliasili, ujenzi na madini.

“Majukwaa haya yatawasaidieni kuongeza uelewa kwenu kuhusu masuala ya uchumi, biashara, upatikanaji wa mitaji, sheria, ujasiriamali na matumizi ya teknolojia.” Amesema Mbembela na kuongeza;

“Ndugu zangu uwepo wa Majukwaa haya utasaidia kuhamasisha uanzishaji wa vikundi vya kiuchumi ili kunufaika na fursa za masoko na mikopo yenye masharti nafuu.”

Mbembela amesema pamoja na malengo hayo pia, Majukwaa hayo yatasaidia kupeana taarifa za fursa za kiuchumi na masoko miongoni mwa vikundi vya wanawake.

Mratibu huyo ameainisha kuwa zoezi hilo limefanyika kuanzia tarehe 01 hadi 09 Novemba 2023 ambapo Divisheni hiyo imefanikiwa kuhuisha majukwaa 15 ambapo wanawake 1,704 wameshiriki.

Kwa upande wake, Katibu wa Jukwaa la Uwezeshaji Wanawake Kiuchumi Halmashauri ya Mji Tunduma, Maua Sanga ameushukuru uongozi wa Halmashauri hiyo kupitia Divisheni ya Maendeleo ya Jamii kwa kuhakikisha Majukwaa yote 15 ya Uwezeshaji Wanawake Kiuchumi yanahuishwa katika Kata zote kwa ufanisi mkubwa.

Aidha, Katibu huyo ametoa rai kwa wanawake wote kujitokeza kwa wingi katika vikao vya majukwaa vitakavyokuwa vikifanyika katika maeneo yao ili wasipitwe na fursa mbalimbali zinazoletwa na Wataalam wa Maendeleo ya Jamii.  

Matukio Katika Picha: