MAMA SAMIA AENDELEA KUTOA VIFAA TIBA VYA KISASA TUNDUMA

Imewekwa : March 10th, 2023

Sekta ya Afya inazidi kuimalika katika Mji wa Tunduma ambapo baada ya ujenzi wa Hospitali ya Mji awamu ya kwanza kukamilika yaani huduma za wagonjwa wa nje (OPD) sasa ni zamu ya Vifaa tiba ambavyo vinaendelea kuletwa na serikali ya awamu ya sita

Mkurugenzi wa Halmashauri ya Mji Tunduma Philemon Magesa amewataka watumishi wa Afya kuvitunza vifaa tiba vyote vinavyotolewa na serikali ya awamu ya sita inayoongozwa na Rais wa Jamhuri ya Muungano wa Tanzania Mhe. Dkt. Samia Suluhu Hassan

Mkurugenzi Magesa ameyasema hayo wakati akishuhudia zoezi la uunganishaji wa vifaa vipya vya Kutambua Ugonjwa kwa mgonjwa ambaye hawezi kuongea (Mahututi) vifaa hivyo kitaalamu vinaitwa (Patient Monitor) kifaa cha kufuatilia hali ya Mgonjwa

Amesema kwamba maelekezo yote yanayotolewa na Rais wa Jamhuri ya Muungano wa Tamzania Mhe. Dkt. Samia Suluhu Hassan na serikali yake kuhusu huduma za Afya kwa wananchi yanatakiwa kuzingatiwa kwa weledi mkubwa ndio maana Rais analeta vifaa tiba ili wananchi wapate huduma bora.

"Serikali ya awamu ya sita chini ya Rais Samia kwa upande wa huduma za afya inajikita kwenye ubora wa huduma hivyo vifaa tiba hivi mnatakiwa kuvitunza vizuri ili viweze kutimiza malengo ya kuwatibu wagonjwa” alisema Mkurugenzi Magesa

Naye Mganga mkuu wa Halmashauri ya Mji Tunduma Dkt. Enock Mwambalaswa amemuahidi Mkurugenzi kuwa atahakikisha wataalamu walio chini yake wanatumia vifaa tiba kwa ajili ya kuwatibu wagonjwa kama lengo la serikali na matakwa ya kazi yanavyowataka

“Vifaa hivi tunajua serikali imetumia gharama kubwa sana kuvinunua na kuamua kuvileta katika Hospitali yetu ya Mji wa Tunduma kwa nia ya kuokoa watu wengi ikizingatiwa hapa Tunduma ni Mpakani hivyo tutavitunza  na kuvitumia kwa weledi mkubwa ili vitoe matunda tarajiwa” alisema Dkt. Mwambalaswa

Serikali imeleta Patient Monitor 06 katika Hospitali ya Mji Tunduma kwa lengo la kuboresha huduma za mpakani kwani Tunduma ndio lango kuu la SADC