Mei Mosi Songwe Yafana

Imewekwa : May 1st, 2025

Na Benton Nollo, TTC

Maadhimisho ya Siku ya Wafanyakazi Duniani (Meimosi) kwa mwaka 2025 mkoani Songwe yamefanyika katika Mji wa Vwawa, Wilaya ya Mbozi tarehe 01 Mei 2025 ambapo zimehudhuriwa na Wafanyakazi kutoka sekta na Taasisi mbalimbali za Serikali.

Mgeni rasmi katika maadhimisho hayo ambayo husherehekewa kila mwaka alikuwa Mkuu wa Wilaya ya Ileje, Mhe. Farida Mgomi, aliyemuwakilisha Mkuu wa Mkoa wa Songwe, Mhe. Daniel Chongolo.

Akihutubia katika viwanja vya maadhimisho, Mhe. Mgomi amewataka Wafanyakazi kushiriki kikamilifu katika Uchaguzi Mkuu unaotarajiwa kufanyika mwezi Oktoba mwaka huu, kwa lengo la kuchagua viongozi bora watakaosimamia masilahi ya Wafanyakazi na ustawi wa Taifa kwa ujumla.

Aidha, alieleza kuwa Serikali ya Jamhuri ya Muungano wa Tanzania inaendelea kuboresha na kusimamia vyema ustawi wa wafanyakazi kupitia hatua mbalimbali ikiwemo utoaji wa ajira mpya, uboreshaji wa mazingira ya kazi, pamoja na kulipa madeni na malimbikizo ya watumishi wa umma.

Katika hotuba yake, Mhe. Mgomi amesisitiza umuhimu wa nidhamu ya matumizi ya rasilimali kwa kuwaagiza waajiri wote kuepuka kuzalisha madeni mapya yasiyo na msingi, ambayo yamekuwa mzigo kwa Serikali.

Ameeleza kuwa ni muhimu kuhakikisha haki za Wafanyakazi zinalindwa kwa mujibu wa Sheria ili kuongeza uwajibikaji na ufanisi katika utoaji wa huduma kwa wananchi.

Vilevile, amezitaka Halmashauri zote ndani ya Mkoa wa Songwe kuhakikisha marekebisho ya mishahara yanatekelezwa kwa haraka pindi mtumishi anapopanda daraja, akisisitiza kuwa ucheleweshaji wa mchakato huo huchangia kuibua madeni yasiyo ya lazima.

Akihitimisha hotuba hiyo, Mhe. Mgomi amewakumbusha waajiri wote kuzingatia misingi ya haki, sheria na kanuni katika kushughulikia masuala ya masilahi ya watumishi.

Maadhimisho hayo yalipambwa na maandamano ya amani, burudani kutoka kwa vikundi vya sanaa, pamoja na maonyesho ya shughuli mbalimbali za wafanyakazi kutoka sekta tofauti, na kuhudhuriwa na viongozi wa kisiasa na wa vyama vya wafanyakazi.

Matukio katika Picha: