MGAO WA PIKIPIKI ZA MAMA SAMIA WAFIKA TUNDUMA

Imewekwa : February 21st, 2023

Afisa watendaji wa kata ya Chiwezi Halmashauri ya Mji Tunduma amekabidhiwa pikipiki iliyotolewa na serikali kwa lengo la kuboresha utendaji kazi na kurahisisha utoaji wa huduma kwa wananchi nchini.

Hafla ya utoaji wa Pikipiki hiyo umefanyika leo tarehe 21/02/2023 katika ofisi za Halmasharui ya Mji Tunduma ambapo Mwenyekiti wa Halmashauri Mhe. Ayubu Mlimba amemkabidhi Ndugu Paulo Jeremia Mwashiuya Afisa mtendaji kata ya chiwezi pikipki hiyo.

 
Mhe. Mlimba ameweka wazi kuwa kata ya Chiwezi ndio kata iliyo pembezoni zaidi mwa Mji wa Tunduma na inahusisha mitaa yenye wakulima na wafugaji ambao wanaishi umbali mrefu toka makao kamuu ya kata hivyo pikipiki hiyo ni kifaa muhimu kwa afisa huyo na inakwenda kumaliza changamoto ya kutembea umbali mrefu kuwafikia wanachi ili kutoa huduma.

Aidha amemtaka afisa mtendaji kuitumia pikipiki hiyo kwa ajili ya kazi iliyokusudiwa na serikali ya kuwahudumia wananchi na si vinginevyo huku akimsisitiza kuitunza na kuithamini kwa kutambua kuwa ni mali ya Umma.
"Tunamshukuru na Kumpongeza sana Rais wa Jamhuri ya Muungano wa Tanzania Mhe. Dkt. Samia Suluhu Hassan kwa kuwathahamini Maafisa Watendaji wa kata, kwa kuwa wao ndio wanawahudumia wananchi moja kwa moja, tumepokea pikipiki moja ambayo leo hii tumemkabidhi mtendaji wa kata ya chiwezi ili ikachochee huduma na kusimamia miradi ya maendeleo” alisisitiza Mhe. Mlimba

Naye Kaimu Mkurugenzi wa Halmashauri ya Mji Tunduma ambaye ni Mkuu wa Divisheni ya Utumishi na Usimamizi wa Rasilimali watu Bwana Josephat Kayombo amesema kuwa nia ya serikali ni kurahisidha huduma kwa wananchi hivyo pikipiki hii itakuwa mkombozi mkubwa katika kuwahudumia wananchi kwa wakati na haraka zaidi tofauti na hapo zamani

“Pikipiki hii tumeitoa kwa kata ya chiwezi hivyo Mtendaji nakuomba uitunze na uhakikishe inafanya kazi za serikali kama malego ya Mhe. Rais, ikatokea unahama mtendaji atakayehamia katika kata hiyo basi aikute ikiwa nzuri na nzima ili iendelee kutoa huduma” alisema Bwana Kayombo

Pia kaimu mkurugenzi huyo aliendelea kumuelekeza Mtendaji kata kuhusu kuhakikisha matumizi sahihi ya pikipiki hiyo yanafuatwa

“Sitegemei kusikia pikipiki hii imekuwa ya kukodisha (bodaboda) hapo hatua za kinidhamu zitachukuliwa dhidi yako, nenda kaitumie katika kukurahishia kuwahudumia wananchi wa kata ya chiwezi na ninaimani kuwa sasa hata utendaji kazi utaongezeka zaidi” alisisitiza bwana kayombo

Kwa upandewake Afisa Mtendaji kata ya chiwezi Bwana Paulo Mwashiuya amemshukuru sana Rais wa Jamhuri ya Muungano wa Tanzania Mhe. Dkt. Samia Suluhu Hassan kwa uamuzi wa kuwanunulia pikipiki watendaji wa kata kwani zitasaidia sana kuwafikia wananchi haraka na kuweza kutatua kero zinazowakumba kwa muda muafaka

“Ninaahidi kuwa pikipiki hii nitaitumia katika majumu yangu ya kila siku ya Utendaji wa kata na hasa katika kuwatumikia wananchi wa kata ya chiwezi, sitoweza kuitumia katika masuala ambayo ni kinyume na matakwa ya ajira yangu na kazi zangu” alisema Mtendaji Mwashiuya

Serikali ya Jamhuri ya Muungano wa Tanzania ilinunua Pikipiki 916 ambazo zilikabidhiwa kwa Watendaji wa Kata na Makamu wa Rais wa Jamhuri ya Muungano wa Tanzania Mhe. Dkt. Philip Mpango, kwenye ukumbi wa Jiji la Dodoma uliopo Mtumba tarehe 14/02/2022