Mhe. Mlimba: Tukishirikiana Tutaokoa Maisha ya Watanzania

Imewekwa : November 10th, 2023

Na Benton Nollo, Tunduma TC

Mwenyekiti wa Halmashauri ya Mji Tunduma, Mhe. Ayubu Mlimba amelishukuru Shirika la Amref kupitia Mradi wa USAID Afya Shirikishi kuhusu kuimarisha ushiriki wao katika kuboresha uelewa na huduma za Kifua Kikuu katika Halmashauri hiyo ambapo amebainisha kuwa kwa ushirikiano huo, afya na maisha ya Wananchi wa Tunduma yataokolewa dhidi ya maradhi hayo.  

Mhe. Mlimba ameyasema hayo alipokuwa akizungumza wakati akifungua Mkutano wa Waheshimiwa Madiwani kuhusu ushiriki wao katika kuboresha uelewa na huduma za Kifua Kikuu katika Halmashauri hiyo, mkutano ambao umefanyika kwenye Ukumbi wa Mikutano wa Halmashauri tarehe 10 Novemba 2023.

“Waheshimiwa Madiwani mnakumbuka mwaka jana wenzetu hawa walikuja, tulijifunza na lengo la mafunzo yoyote yale ni lazima yawe na mrejesho, ili kujitathmini kuona kama leo tunapokutana tena je, kuna mafanikio katika mapambano ya kuzuia ugonjwa huu tangu mwaka jana tulipopata uelewa…hili ni jambo la msingi sana kwetu sisi kama viongozi wa kijamii.” Amesema Mhe. Mlimba na kuongeza;

“Viongozi wenzangu pamoja na ninyi wawezeshaji, lengo la Mheshimiwa Rais Samia ni kuhakikisha kwamba wananchi wake wanakuwa na afya njema wakati wote, kwa kuwa ukiwa na wananchi ambao afya zao siyo njema kwa hiyo hata uchumi hauwezi kusonga mbele, kwa hiyo kama lengo ndo hilo kuna haja basi tunapopeana mafunzo kama hayo, ni vema tukapeana mrejesho wa kile tulichojifunza na tumekwenda kufanya kazi ya kuwahamasisha Wananchi njia sahihi za kuepukana na maradhi haya.”

Kwa upande wake Kaimu Mkurugenzi wa Halmashauri ya Mji Tunduma, Selemani Kateti amelishukuru Shirika la Amref kwa kushirikiana na Kituo cha Maendeleo ya Mawasiliano Tanzania - TCDC kwa kuona umuhimu wa kutoa mafunzo hayo ambayo yatasaidia kupata mrejesho wa mafunzo ya awali yaliyofanyika mwaka jana (2022).

“Kikao chetu cha leo kitatusaidia sana kupata mrejesho, kwanza wa maazimio yale ambayo tulikubaliana katika kikao kilichopita, lakini kuangalia mikakati ile tuliyotumia kuhakikisha tunapata mrejesho tegemewa na hasa ukizingatia Waheshimiwa Madiwani hawa ndiyo wanatoka kwenye jamii na ndiyo wanashiriki shughuli mbalimbali kama wawakirishi wa Wananchi kwenye jamii zetu.” Amesema Kateti na kuongeza;

“Pia, kikao hiki kitatusaidia kutengeneza maazimio mapya na mikakati mipya kwa namna ambayo Serikali na Wafadhili wamedhamiria katika kukabiliana na Ugonjwa wa Kifua Kikuu.”

Kateti amesema kuwa Ugonjwa wa Kifua Kikuu ni hatari lakini una nafuu kwa kuwa unatibika hasa Wagonjwa wakizingatia maelekezo ya Madaktari na Wataalam wengine wa afya fotauti na magonjwa mengine.

Hivyo, Kateti ametoa rai kwa Waheshimiwa Madiwani kama Wawakirishi wa Wananchi kutumia fursa hiyo kujielimisha vizuri ili kwenda kuhamasisha wananchi kujitokeza katika vituo vyote vya kutolea huduma za afya kupima afya zao ili wale wanaobainika kuwa na bakteria wa ugonjwa huo waanze tiba mapema.

Naye, Mratibu wa Mradi wa USAID Afya Shirikishi wa Amref Mkoa wa Songwe, Dkt. Malneste James amesema amesema mradi huo umejikita zaidi kwenye jamii kwa kuwa kuna wananchi wanaumwa lakini hawawezi kufika katika vituo vya kutoa huduma za afya kwa sababu mbalimbali ikiwemo umbali.

“Sisi kama Wadau tulikaa na kubaini kuwa pamoja na kuboreshwa kwa huduma za afya zinazotolewa sasa hivi na Serikali pamoja na wadau mbalimbali katika huduma za afya nchini lakini bado kuna changamoto katika baadhi ya maeneo ikiwemo upungufu wa rasilimali watu na rasilimali fedha.” Amesema Dkt. James.    

Dkt. James ameishukuru Serikali kwani moja ya maazimio ya kikao kilichopita ni kwamba Waheshimiwa Madiwani waliazimia huduma za Mionzi kwa Wagonjwa wa Kifua Kikuu ziwe bure na hilo limetekelezwa.

Mkuu wa Divisheni ya Afya, Ustawi wa Jamii na Lishe Halmashauri ya Mji Tunduma, Dkt. Enock Mwambalasa amesema kutokana na mchango wa Wahudumu Ngazi ya Jamii hali ya maambukizi ya Ugonjwa wa Kifua Kikuu umepungua hadi kufikia wagonjwa 138 mwaka huu 2023 ukilinganisha na wagonjwa 252 mwaka 2022.

Matukio Katika Picha: