MIKATABA YENYE THAMANI YA SHILINGI BILIONI MOJA YASAINIWA TUNDUMA

Imewekwa : July 23rd, 2023

Na William Maganga - Tunduma TC

Halmashauri ya Mji Tunduma imesaini mkataba wa Tsh. 1,036,169,305 kwa lengo la kuboresha miundombinu mbalimbali ikiwemo uchongaji wa Madirisha na Samani za Ofisi za Shule ya Sekondari DKT. SAMIA S. H. na ujenzi wa Madarasa katika Shule ya Sekondari Tunduma TC

Mwenyekiti wa Halmashauri ya Mji Tunduma Mhe. Ayubu Mlimba amewataka mafundi waitumie vema nafasi hii na kuonyesha umahiri wa kazi zao kwa weledi kwani watakapo fanya vibaya hawatakuwa na nafasi ya kufanya vibaya

“Nimategemeo ya Halmashauri kuwa kazi mlizoomba hamkulazimishwa ni ninyi wenyewe mmezitaka hivyo rai yangu kwenu mfanye kazi kwa uzalendo ili muitendee haki taaluma yenu katika kulijenga Taifa” alisisitiza Mhe. Mlimba

Wakati wa kusaini mkataba huo Mkurugenzi wa Halmashauri ya Tunduma Bw. Philemon Magesa amesema mkataba huo ni wa wazi na mkandarasi amepata kulingana na vigezo husika na si kubebwa na mtu hivyo anategemea taaluma zao zitatumika katika kutekeleza miradi hiyo

Ameongeza kuwa Mkandarasi awasiliane na mhandisi wa Halmashauri ya Mji Tunduma kama kuna mabadiliko au kutokueleweka kwa ramani, michoro, vipimo na ubora wa miradi. Pia wahakikishe kazi zinafanyika kwa kasi usiku na mchana bila kuathiri viwango vya ubora kadri ya mkataba ulivyo.

"Taa zimefungwa ili kazi ifanyike usiku na mchana, lengo ni kukamilisha mradi mapema kwa kupunguza siku za ukamilishaji wa mradi. Pia Mkandarasi hakikisha mnaongeza nguvu kazi za kutosha ili mkamilishe mradi mapema zaidi". Alisema Mkurugenzi

Nae Afisa Maendeleo ya Jamii wa Halmashauri ya Mji Tunduma Bi. Mwanaisham Shemaghembe ameshukuru namna mikataba hiyo ilivyosainiwa kwa uwazi na kusisitiza ushirikiano katika utekelezaji wa miradi ili isijekutokea sintofahamu pindi mkandarasi akishindwa kutekeleza wajibu wake kuligana na matakwa ya mkataba