Mnao Wajibu Kuwasimamia CHWs: DC Mwandobo

Imewekwa : May 20th, 2025

Na Benton Nollo, TTC

Mkuu wa Wilaya ya Momba, Mhe. Elias Mwandobo amewaagiza Watendaji wa Kata wote Halmashauri ya Mji Tunduma kuwasimamia ipasavyo Wahudumu wa Afya Ngazi ya Jamii - CHWs, kuwatembelea na kutoa elimu ya masuala ya lishe kaya zenye Wajawazito na Watoto wadogo chini ya miaka mitano ili kuifanya jamii kuwa na uelewa wa kutosha kuhusu lishe ambapo kwa kufanya hivyo afya zao zitakuwa bora.

Mhe. Mwandobo ametoa agizo hilo wakati wa kikao cha Kamati ya Tathmini ya Lishe Ngazi ya Halmashauri kwa kipindi cha robo tatu ya mwaka wa fedha 2024/2025 kilichofanyika kwenye Ukumbi wa Mikutano wa Halmashauri ya Mji Tunduma tarehe 20 Mei 2025.

" Watendaji wa Kata nyie ndiyo mnao wajibu wa kuwasimamia CHWs katika maeneo yenu ili watembelee kaya zenye Wajawazito na Watoto Chinese ya miaka mitano kwa lengo la kutoa elimu ya masuala ya lishe maana hapo ndipo kwenye msingi wa kujenga jamii yenye afya bora ya baadaye." Amesema Mhe. Mwandobo.

Aidha, Mhe. Mwandobo amesisitiza suala la uchangiaji chakula shuleni, kwamba kwa kuwa msimu huu ni wamavuno Watendaji  wa Kata wahamasishe ukusanyaji wa chakula kutoka kwa Wazazi lakini pia waimarishe usimamizi wa matumizi ya chakula kinachopatikana, ili kuleta hamasa kwa Wazazi kuendelea kuchangia wakiwa na uhakika chakula kinachopatikana kinatumika ipasavyo.

Kwa upande wake Afisa Lishe Halmashauri ya Mji Tunduma, Frida Muhindi akizungumza alipokuwa akiwasilisha taarifa ya tathmini ya utekelezaji wa Afua za Lishe, kwa kipindi hicho katika kiashiria cha CHWs kutembelea kaya zenye Wajawazito na Watoto wadogo chini ya miaka mitano, kaya 13,227 zilitembelewa ambapo Kaya 8,964 zilikuwa na Wajawazito na Watoto wadogo huku Wazazi na Walezi wenye Watoto wa miezi 0 - 23 wapatao 4,307 walipatiwa unasihi wa ulishaji wa Watoto wadogo.

Kwa kiashiria cha idadi ya watoto wanaokula chakula shuleni imeongezeka hadikufikia asilimia 82.97 ukilinganisha na asilimia 79.73 robo ya pili huku kiashiria cha maadhimisho ya Siku ya Afya na Lishe kwenye Mitaa kimefanyika vizuri na kwa wakati.

 Pia, kiashiria cha utoaji wa fedha kwa Halmashauri zimetolewa shilingi milioni 110 kati ya shilingi milioni 142.7 sawa na asilimia 77.07.

Matukio katika Picha: