Msenjelwa Awaapisha Wajumbe Kamati ya Huduma ya Mikopo Ngazi ya Kata, Kupatiwa Mafunzo

Imewekwa : October 7th, 2024

Na Benton Nollo, TTC

Hakimu Mkazi Mwandamizi Wilaya ya Momba, Claudi Msenjelwa (pichani) amewaapisha Wajumbe wa Kamati ya Huduma ya Mikopo ya Asilimia Kumi (10%) Ngazi ya Kata katika Halmashauri ya Mji Tunduma, kwa ajili ya kujengewa uwezo kuhusu Kanuni na Mwongozo wa Usimamizi wa Utoaji wa Mikopo hiyo tukio ambalo lilifanyika kwenye Ukumbi wa Mikutano wa Shule ya Sekondari Tunduma TC tarehe 07 Oktoba 2024.

Msenjelwa amewaasa Wajumbe hao kuzingatia kiapo chao kwa kufanya kazi kwa bidii na uadilifu mkubwa katika kutekeleza majukumu yao wakati wa mchakato wa utoaji wa mikopo ya Asilimia Kumi (10%) kwa Makundi yanayonufaika na mikopo hiyo ambayo ni Wanawake, Vijana na Wenye Ulemavu.

"Ndugu Washiriki niwaombe mtambue kuwa mnapaswa kuishi kiapo chenu kwa sababu yeyote atakayekwenda kinyume na kiapo hiki Sheria itachukua mkondo wake hivyo mnapaswa kufuata taratibu zote za utoaji wa mikopo hii kwa uadilifu mkubwa.” Amesema Msenjelwa na kuongeza;

“Ni lazima tuhakikishe kwamba mwongozo wa Usimamizi na Utoaji wa Mikopo kwa Vikundi vya Wanawake, Vijana na Watu Wenye Ulemavu unafuatwa ili walengwa waweze kunufaika kwa haki na si vinginevyo."

Kwa upande wake Mkuu wa Divisheni ya Maendeleo ya Jamii Halmashauri ya Mji Tunduma, Mwanaishamu Nassor alisema mafunzo kwa Wajumbe hao ni ya siku moja na yanahusu kujua malengo na umuhimu wa mwongozo wa Usimamizi na Utoaji wa Mikopo ya Asilimia Kumi (10%) kwa Vikundi vya Wanawake, Vijana na Watu Wenye Ulemavu.

Nassor alisema Wajumbe watajifunza kuhusu Kanuni na Taratibu za Utoaji wa Mikopo ya Vikundi ambapo ndani yake watajifunza kuhusu Kanuni za usimamizi na utoaji wa mikopo, viwango vya ukomo wa utoaji wa mikopo, kikundi kuhitimu kunufaika na mikopo pamoja na orodha ya vitu vya kuzingatiwa wakati wa kufanya tathmini ya kikundi kuhitimu kunufaika na mikopo.

Pia, Nassor alisema hatua za uundaji wa vikundi ni moja ya mambo ambayo Wajumbe hao watajifunza ambapo wataelekezwa kuhusu utambuzi wa vikundi na wajibu wa vikundi.

Kadhalika, Nassor aliainisha kuwa Wajumbe watafundishwa kuhusu muda wa kushughulikia maombi ya mikopo, mikopo ya vifaa, urejeshwaji wa mikopo, utaratibu wa ufuatiliaji na ukusanyaji wa marejesho kwa Mfumo wa Serikali Ulioboreshwa, utaratibu wa marejesho kwa Mfumo wa Serikali Ulioboreshwa, kuchelewesha na kushindwa kurejesha mkopo pamoja na matumizi ya fedha za mikopo kwa wanakikundi.

Pamoja na mambo mengine, Wajumbe walielekezwa kuhusu muundo na majukumu ya Wasimamizi wa Mikopo Ngazi ya Kata, ufuatiliaji na tathmini ya hali halisi ya kikundi kinachoanza kupata mikopo.

Aidha, Wajumbe walielezwa kuwahamasisha Wananchi hasa makundi hayo kujitokeza kupata mafunzo muda utakapowadia kwani Halmashauri ya mji Tunduma mpaka kufikia mwezi Septemba 2024 inazo shilingi bilioni 4.1 ambazo zinatokana na mapato ya ndani ya Halmashauri hiyo kwa ajili ya mikopo hiyo ya Asilimia Kumi.

Ambazo amesema mpaka kufikia tarehe 30 Oktoba 2024 zinatakiwa kuwa zimeshakopeshwa kwa makundi hayo kwa kipindi cha robo ya kwanza ya mwaka wa fedha 2024/2025.

Nassor ameeleza kuwa sababu iliyosababisha mikopo ya Asilimia Kumi (10%) kusimama kwa muda ilikuwa ni kufanya maboresho ya kanuni za utoaji mikopo ili mikopo inayotolewa iwe na tija kwa jamii.

"Maboresho yamefanyika katika suala la umri kwa upande wa vijana ambapo kwa sasa umri wa kijana umeongezeka kuanzia miaka 18 hadi miaka 45 wakati awali kigezo kilikuwa ni kuanzia umri wa miaka 18 hadi miaka 35 hivyo, marekebisho hayo yameongeza wigo kwa vijana wengi kupata mikopo hii.” Amesema Nassor.

Nassor amefafanua kuwa kigezo kingine kwa wanakikundi kupata mkopo huo ni kuwa na namba ya NIDA kwani uwepo wa namba hiyo utarahisha upatikanaji wa taarifa muhimu za mkopaji katika mfumo.

Ameongeza kuwa ili kuongeza ufanisi zaidi wa utoaji wa mikopo, Divisheni ya Maendeleo ya Jamii itafanya ukaguzi wa andiko la biashara husika, soko pamoja na kuangalia uhalisia wa biashara kabla ya kutoa mikopo kwa wakopaji kwani hii itasaidia kupunguza hasara kwa wanufaika wa mikopo hiyo.

Nassor amesisitiza wakopaji wote wa mikopo ya Asilimia Kumi (10%) watatakiwa kuhakikisha kuwa wanarejesha kwa wakati marejesho yao ili kutoa nafasi ya watu wengine kukopa.

Mikopo ya Asilimia Kumi (10%) hutolewa kila robo mwaka kwa Wanawake, Vijana na Wenye Ulemavu, ili kuwasaidia kujiinua kiuchumi.

Matukio katika Picha: