Mwenge wa Uhuru 22024 Umekagua Kikundi cha JAK Real Estate Investors

Imewekwa : September 4th, 2024

Na Benton Nollo, TTC 

Kiongozi wa Mbio za Mwenge wa Uhuru Kitaifa 2024, Godfrey Eliakimu Mnzava ametembelea na kukagua mradi wa Kikundi cha Vijana cha JAK Real Estate Investors kilichopo Kata ya Majengo katika Halmashauri ya Mji Tunduma wilayani Momba tarehe 04 Septemba 2024.

Kikundi hicho ambacho kinajishughulisha na uwekezaji katika ardhi ni wanufaika wa mkopo wa shilingi milioni 80 ambayo inatokana na asilimia 10 ya mapato ya ndani ya Halmashauri ya Mji Tunduma kwa awamu mbili tofauti ambapo kwa mwaka wa fedha 2021/2022 kikundi kilikopeshwa shilingi milioni 20 na kwa mwaka wa fedha 2022/2023 kilikopeshwa shilingi milioni 60.

Kikundi cha JAK Real Estate Investors chenye Wanachama Watano (wakiume wanne na wa kike mmoja) ambao ni wahitimu wa vyuo vikuu, kimefanikiwa kujenga jengo jipya la Ofisi katika Mtaa wa Mpemba, Kata ya Mpemba.

Moja ya mafanikio mengine ni kwamba kikundi kimeongeza ajira zisizo rasmi kwa vijana nane, kimepima viwanja 731 katika Halmashauri ya Mji Tunduma,  viwanja 78 Halmashauri ya Wilaya ya Mbozi na viwanja 53 katika Halmashauri ya Manispaa ya Sumbawanga.

Mafanikio mengine ni kwamba kikundi kimepima mashamba matano katika Kata ya Chiwezi Halmashauri ya Mji Tunduma.

Pia, kikundi kimefanikiwa kumiliki maeneo yake matano kwa Hati za Hakimiliki za Ardhi za muda mrefu yenye matumizi ya Hoteli na nyumba ya kulala wageni yenye thamani ya milioni 40.

Matukio katika Picha: