MWIZI NI MWIZI HAIJALISHI ANATOKA ZAMBIA AU TANZANIA_DC LULANDALA

Imewekwa : October 21st, 2022

Mkuu wa Wilaya ya Momba Mhe. Fack Lulandala ameyasema hayo alipokuwa kwenye kikao cha Ujirani mwema kinacho jumuisha Viongozi wa Wilaya ya Nakonde – Zambia na Viongozi wa Wilaya ya Momba – Tanzania kilicho fanyika katika Ukumbi wa Hoteli ya Zwangendaba Fresh Air uliopo Nakonde nchini Zambia Oktoba 21, 2022

Mkuu wa wilaya wa momba amefikia hatua hiyo baada ya kupata taarifa kuwa kumekuwa na matukio ya kihalifu kwa baadhi ya watu ambao wakiiba Tunduma (Tanzania) wanakimbilia Nakonde (Zambia) na wakiiba Zambia wanakimbilia Tanzania

“Wezi wote wanaoiba Tanzania au Zambia wanatakiwa kushughulikiwa kikamilifu kwa mujibu wa sheria. Makamanda wetu wote OCD Tunduma na OCD Nakonde mpo hapa muongeze ushirikiano katika kutusaidia hili jambo mpaka wetu wa Tunduma – Nakonde unatakiwa kuwa salama na wenye amani kwa wageni wote. Ninaimani kuwa makamanda wa uhamiaji pia mtafanya kama wenzenu wa Polisi ili kuendelea kuutunza mpaka wetu vizuri” alisema DC Lulandala

Nae Mkuu wa kituo cha polisi Tunduma ASP Geofrey P. Mshani ambaye pia ni Kaimu OCD Momba alisema kwa sasa Jeshi la Polisi Tunduma linashirikiana na Jeshi la Polisi la Nakonde kwa kufanya Doria za pamoja katika kukabiliana na wahalifu wanao iba au kufanya makosa nchi moja na kukimbilia nchi nyingine.

“Kwa sasa tunafanya doria ya pamoja na kushirikiana pindi tunapoona mhalifu tunapeana taarifa ili kuwabaini, nia yetu ni kutokomeza uhalifu hapa mpakani ili wageni wote waje na kuondoka kwa amani” alimsema ASP Mshani

Kwa upande wake Mkuu wa wilaya ya Nakonde Mhe. Marvellous Sikapizye amesema kuwa Tunduma na Nakonde ni ndugu kwani watu wake wanaoana na kushirikiana katika mambo ya kimila na desturi za kijamii.

“Chifu wa Msangano Tanzania ni kaka wa chifu wa Nakonde na chifu wa isoka kwahiyo sisi ni ndugu na udugu wetu unatakiwa kuendelea, tutaendeleza kushirikiana katika Nyanja zote za Usalama, Mipaka ya nchi, Urafiki na Ujirani mwema” alimsema DC Sikapizye

Miongoni mwa mambo yaliyo jadiliwa katika kikao hicho cha ujirani mwema ni Pamoja na jinsi kupunguza msongamano wa Magari upande wa Tunduma yanayovuka Kwenda nchi ya Zambia ambayo yamekuwa yakiathiri baadhi shughuli za kawaida za wakazi wa Tunduma. Na jinsi ya kuwaondoa Machinga wanaofanya biashara katika maeneo ya mpaka ambayo hayaruhusiwi kisheria kufanyia biashara.