MZAZI ATAKAYEKWEPA MAJUKUMU YAKE HATUA KALI ZITACHUKULIWA DHIDI YAKE

Imewekwa : January 2nd, 2023

Mkurugenzi wa Halmashauri ya Mji Tunduma Philemon Magesa amewataka watumishi wote kuhakikisha wanaendelea kutoa Elimu huko mitaani katika kipindi hiki cha sikukuu kwa wananchi hususani wazazi na walezi wote wa Watoto wanaotakiwa kujiunga na Darasa la Awali, Darasa la kwanza na Kidato cha Kwanza kuwa shule zitafunguliwa Januari 9, 2023

Hivyo kila mzazi anatakiwa kuhakikisha mtoto anafika shule siku ya kufunguliwa kwa mwaka wa masomo na kuanza kusoma.

“Sisi kama serikali jukumu letu tumelikamilisha kwa kuandaa vyumba vya madarasa na kununua vifaa vya kufundishia na kujifunzia. Kwa hiyo hakuna sababu ya mzazi kutokumleta mwanafunzi” alisisitiza Mkurugenzi Magesa

Nendeni mkawakumbushe wazazi kuwa uandikishaji wa Darasa la Awali na Darasa la Kwanza mwisho ni Disemba 30, 2022 hivyo wazazi na walezi wote wanapaswa kuwaandikisha watotom wao katika shule zilizopo karibu yao ili Watoto hao wapate haki yao ya msingi ya Elimu.

Tunaendelea kumshukuru sana Rais wa Jamhuri ya muungano wa Tanzania Mhe. Dk. Samia Suluhu Hassan kwa kuendelea kuiwezesha kada ya elimu Msingi na Sekondari kwa kutoa pesa nyingi kwa ajili ya ujenzi wa miundombinu kwa ajili ya Watoto wa Kitanzania kupata elimu tena bila malipo.

“Haiwezekani Serikali itoe pesa tujenge madarasa na vifaa vingine pia ifute ADA kwa wanafunzi wote toka Darasa la Awali hadi kidato cha sita, halafu mzazi/mlezi kwa matakwa yake yeye mwenyewe asimlete mtoto shule. Hakika hapo hatopona mtu sheria lazima ichukue mkondo wake kwa wazazi/walezi wa aina hiyo” alisisitiza TD Magesa

Halmashauri ya Mji Tunduma inatarajia kuwa na wanafunzi 4309 wa kidato cha kwanza na Sekondari kwa Ujumla ni 12,228 yaani tangu kudato cha kwanza hadi kidato cha sita. Kwa upande wa Elimu Msingi. Na upande wa Elimu ya Awali Halmashauri ya Mji Tunduma inatarajia kuwa na wanafunzi 4161 na Elimu ya Msingi yaani Darasa la Awali hadi Darasa la Saba ni 42127.