RC Chongolo Aridhishwa, Ujenzi wa Bwalo Dkt. Samia SH

Imewekwa : April 10th, 2025

Benton Nollo na Atwiya Mohamed, TTC.

Mkuu wa Mkoa wa Songwe, Mhe.Daniel Chongolo, ameridhishwa na maendeleo ya ujenzi wa Bwalo la Chakula linalojengwa katika Shule ya Sekondari ya Wasichana ya Dkt. Samia SH iliyopo Kata ya Namole, Halmashauri ya Mji Tunduma, wilayani Momba.

Akizungumza wakati wa ziara yake ya siku moja aliyoifanya katika Halmashauri hiyo tarehe 10 Aprili 2025, mara baada ya kukagua mradi huo, Chongolo amesema sasa ameridhika na kazi nzuri ya usimamizi na utekelezaji unaoendelea.

"Nikupongeze sana Mkuu wa Wilaya na uongozi wa Halmashauri, leo mmefuta hasira zangu zote kwani nimeona na kufurahishwa na kazi nzuri ya usimamizi mliyoifanya katika mradi huu". Amesema Chongolo na kuongeza;

"Mara ya mwisho nilipokuja hapa nilikataa hata kusaini kitabu cha wageni, lakini sasa lazima mmefuta hasira zangu."

Hata hivyo, Mhe. Chongolo ameutaka Uongozi wa Halmashauri hiyo kuhakikisha ifikapo tarehe 25 Aprili 2025 bweni hilo liwe limeanza kutumika rasmi, huku akiahidi kushiriki chakula cha pamoja na Wanafunzi kama ishara ya mafanikio ya utekelezaji wa mradi huo.

Kwa upande wake, Mkurugenzi wa Halmashauri ya Mji Tunduma, Mariam Khatib Chaurembo, amesema tayari Halmashauri hiyo imefanya mabadiliko ya bajeti (realocation) kwa kutenga shilingi milioni 350 kwa ajili ya kukamilisha kazi zilizobaki.

Chaurembo amesema bwalo hilo linatarajiwa kugharimu shilingi milioni 800 hadi kukamilika kwake, na ameahidi kuwa mradi huo utakamilishwa kwa viwango na kwa muda uliopangwa.

Mhe. Chongolo amefanya ziara ya siku moja ya kutembelea Halmashauri hiyo ikiwa ni muendelezo wa ziara yake katika Halmashauri za Mkoa wa Songwe kwa ajili ya kukagua miradi mbalimbali ya maendeleo.

Matukio katika Picha: