RC Chongolo Atembelea Kiwanda cha Spirit of Family Investment Ltd, Atoa Pongezi kwa Ubunifu, Ujasiri wa Kuwekeza

Imewekwa : May 5th, 2025

Mkuu wa Mkoa wa Songwe, Mhe. Daniel Chongolo ametembelea kiwanda cha kutengeneza pombe kinachomilikiwa na Kampuni ya Spirit Of Family Investment Limited, kilichopo katika Halmashauri ya Mji Tunduma.

Mhe. Chongolo ametembelea kiwanda hicho leo Jumatatu Mei 5, 2025 ambapo Kiwanda hicho kipo chini ya uongozi wa Mkurugenzi Mkuu, Bw. David Mwampamba na kinazalisha vinywaji maarufu vya DEV GIN na SIXPACK.

Katika ziara hiyo, Mhe. Chongolo alimpongeza Bw. Mwampamba kwa ujasiri na ubunifu wake katika kuanzisha kiwanda hicho, Amesema:

"Hongera sana. Umefanya kitu kikubwa ambacho wengi hawajathubutu kufanya. Tumewaona watu wengi wakubwa waliofanikiwa kwa kuanza na vitu vidogo. Mimi kama Mkuu wa Mkoa na Mwenyekiti wa Kamati ya Kodi ya Mkoa, naamini kuwa tusipowajengea watu wetu uchumi, hatuwezi kujenga mazingira ya mafanikio ya kweli."

Aidha, Mhe. Chongolo alisisitiza umuhimu wa kuwa na vyanzo vipya na vya uhakika vya kodi kwa ajili ya kuongeza makusanyo ya mapato ya serikali. Alitoa wito kwa viongozi na jamii kwa ujumla kuwatia moyo na kuwaunga mkono wajasiriamali wa ndani waliothubutu kuanzisha miradi ya kiuchumi.

"Hongera kwa uthubutu, hongera kwa kuanza. Kikubwa simamia ubora na ulipe kodi kwa uaminifu. Hongera sana."

Ziara hiyo ni dhamira ya Mkoa wa Songwe kuunga mkono jitihada za sekta binafsi katika kukuza uchumi wa mkoa na taifa kwa ujumla.

Matukio katika Picha:

(Chanzo: Habari na Picha na Ofisi ya Mkuu wa Mkoa wa Songwe).