RC KINDAMBA ATOA MAAGIZO KWA MA-DC KUWACHUKULIA HATUA WAZAZI WASIONDIKISHA WATOTO SHULE

Imewekwa : January 13th, 2023

Mkuu wa Mkoa wa Songwe (RC), Waziri Kindamba amewaagiza wakuu wa wilaya za mkoa huo kuwachukulia hatua wazazi ambao mpaka sasa hawajawapeleka watoto kuanza masomo.

Ametoa agizo hilo leo Jumatano Januari 11, 2023 akizungumza na waandishi wa habari ofisini kwake kuhusu mwenendo wa uandikishaji wa wanafunzi wa awali, darasa la kwanza na kidato cha kwanza katika mkoa huo.

Kindamba amesema kuwa kutokana na mwamko mdogo wa uandikishaji wa wanafunzi mwaka 2023, anawaagiza wakuu wa wilaya kuchukua hatua kwa wazazi wenye watoto ambao wanatakiwa kujiunga na masomo lakini bado hawajaandikishwa.

Amesema kuwa mpaka sasa wanafunzi wote walioandikishwa kuanzia darasa la awali, darasa la kwanza na kidato cha kwanza ni asilimia 64 tu ambapo hali hiyo hairizishi kimkoa.

"Mkoa wetu sababu ni wa kilimo watoto wanapelekwa shambani badala ya shule hili nilikemee na halikubaliki. Pia kuna watoto wanachukuliwa kupelekwa kwenye miji mikubwa kwenda kufanya kazi za ndani, nimewaagiza wakuu wa wilaya wachukuueni hatua, suala la elimu ni la lazima" ameagiza Kindamba

"Na hali mbaya zaidi ni kwa wanafunzi wakike wa kuanza kidato cha kwanza ambayo ndio rika inayochukuliwa kufanya kazi za ndani na kuwafungisha ndoa za utotoni" amebainisha

Mkuu huyo wa mkoa amesema baada ya mwezi mmoja watafanya tathimini ya hali ya uandikishaji wa wanafunzi katika mkoa huo.

"Tunaamini bado ni mapema labda takwimu zitaongezeka baada ya mwezi mmoja tena tutafanya tathimini na kupata takwimu" amesema Kindamba na kuongeza:

"Tunazidi kumshukuru kwa namna ya pekee mama Samia (Rais Samia Suluhu Hassan) kwa kuendelea kufanya mambo makubwa katika nchi hii kwa kutuletea Sh2.5 bilioni kwaajil ya ujenzi wa madarasa 115 na madawati yake kwa hiyo wanafunzi hawana kisingizio cha kukosa darasa wala dawati" amesisitiza Mhe. Kindamba