RC MICHAEL ATAKA UIMARISHWAJI WA SOMO LA KUANDIKA, KUHESABU, KUSOMA

Imewekwa : June 2nd, 2023

Na William Maganga - Tunduma TC

SONGWE: Mkuu wa Mkoa wa Songwe, Mhe. Dkt. Francis Michael ameziagiza Halmashauri zote za Songwe kuimarisha somo la kuandika, kuhesabu na kusoma (KKK) kwa wanafunzi wa elimu msingi ili kusiwe na mwanafunzi ambaye anamaliza elimu msingi bila kujua kusoma, kuandika na kuhesabu.

Mkuu wa Mkoa, Mhe. Dkt. Francis Michael ametoa wito huo wakati wa kikao kazi cha UNICEF chenye lengo la kutambulisha vipaumbele vya sekta ya Elimu ambavyo UNICEF inakwenda kuvitekelezaa kwa upande wa elimu msingi, kilichofanyika Mei 30 na kuhudhuriwa na viongozi wa Wilaya na Halmashauri.

Mhe. Dkt. Francis Michael amesema haipendezi kuona mwanafunzi anafika darasa la tano au la saba alafu hajui kusoma, kuandika na kuhesabu, twendeni tukaimarishe masomo haya ili wanafunzi wajue kusoma, kuandika na kuhesabu.

Pia, Mkuu wa Mkoa ametoa wito kwa Halmashauri kwenda kuimarisha Shule shikizi pamoja na elimu ya watu wazima ili kuhakikisha elimu inafika kwa watu wote.

Aidha, Mkuu wa Mkoa wa Songwe, Mhe. Dkt. Francis Michael ametoa wito kwa wananchi wenye uwezo kuwasaidia wanafunzi ambao wanashindwa kwenda Shule kwa sababu ya kukosa mahitaji muhimu ya Shule.

Tunajua elimu ya saizi Serikali ya awamu sita inatoa elimu bila ada kuanzia elimu ya msingi hadi kidato cha sita, lakini kuna nahitaji yanahitaji fedha, niombe kwa wale wenye uwezo basi waweze kuwasaidia wanafunzi wenye shida, amesisitiza, Mhe. Dkt. Francis Michael.