RC Songwe Afanya Ufuatiliaji Wanafunzi Kuripoti Shule

Imewekwa : January 8th, 2024

Na Benton Nollo na Shadida Salum, TTC

Mkuu wa Mkoa wa Songwe, Dkt. Fransis Michael leo tarehe 8 Januari 2024 amefanya ziara ya kikazi katika Halmashauri ya Mji Tunduma kwa lengo la kukagua zoezi la upokeaji wa Wanafunzi wa Awali, Darasa la Kwanza pamoja na Kidato cha Kwanza.

Dkt. Michael amefanya ziara hiyo ikiwa ni sehemu ya utekelezaji wa agizo la Waziri wa Nchi, Ofisi ya Rais, Tawala za Mikoa na Serikali za Mitaa (TAMISEMI), Mhe. Mohamed Mchengerwa alilolitoa hivi karibuni jijini Dar es Salaam wakati akizungumza na Wakuu wa Mikoa wote nchini.

Mkuu wa Mkoa huyo amefanya ziara hiyo kwa lengo la kujionea hali halisi ya upokeaji wa wanafunzi hao ambapo shule alizotembelea ni Shule ya Sekondari Tunduma TC, Shule ya Sekondari Uwanjani na Shule ya Sekondari Chipaka.

Katika ziara hiyo Dkt. Michael amekutana na walimu na wanafunzi ili kupata picha kamili ya jinsi upokeaji wa wanafunzi unavyofanyika lakini pia amefanya ukaguzi wa miundombinu ya shule na rasilimali zilizopo kama madawati.

Kupitia ziara hiyo Mkuu wa Mkoa ameridhishwa na hali ya kuripoti kwa wanafunzi shuleni kwani tayari wameshaanza masomo na amefafanua kuwa Shule ya Sekondari Chipaka imepokea Wanafunzi 38 kati ya wanafunzi 65 sawa na asilia 58.

Kwa upande wa Shule ya Sekondari Uwanjani wamepokelewa Wanafunzi 210 kati ya Wanafunzi 393 sawa na asilimia 53 huku Shule ya Sekondari ya Tunduma TC wameripoti Wanafunzi 92 kati ya Wanafunzi 103 sawa na asilimia 90 ya waliochaguliwa kujiunga na shule hiyo.

Katika ziara hiyo, Dkt. Michael ametoa maelekezo kwa Maafisa Elimu na Walimu kuweka umuhimu wa kuwapa mapokezi bora Wanafunzi ili kuwawezesha kuanza masomo yao kwa ufanisi huku akiwasihi wazazi kuwapeleka shuleni watoto wote ambao wanastahili.

“Niwasihi wazazi wasiache kuwapeleka watoto shule kwa kuhofia kukosa sare sisi tumekwisha kutoa maelekezo kwa Walimu Wakuu wawapokee watoto hao huku wazazi wao wakiwa wanaendelea kuwatafutia sare hizo suala hili lisimkoseshe mtoto masomo ya awali” Amesema Dkt. Michael na kuongeza kuwa:

 “Mtoto anapoingia Kidato cha Kwanza au Darasa la Kwanza ni wakati muhumu sana kwake kuweza kuweka msingi wake wa elimu, masomo ya awali yakimpita anakuwa na msingi mbovu sana na ataanza kuichukia shule kwahiyo ndo maana tunasema mtoto apelekwe shule wazazi wataendelea kutafuta sare mtoto akiwa shule.”

Akifafanua kuhusu mikakati ambayo Mkoa imeweka ili kuhakikisha idadi ya wanafunzi wanaoanza shule inabaki hivyo mpaka wanapohitimu, Mkoa umeanzisha utaratibu wa kuboresha miundombinu ya baadhi ya Shule na kuweka mabweni ili kuzifanya kuwa shule maalum kwa ajili ya watoto wa kike ambao wamekuwa wakikatisha masomo kutokana na changamoto mbalimbali ikiwemo umbali wanaotoka.

Matukio katika Picha: