MACHINGA 1200 WAPEWA MAENEO RAFIKI KWA AJILI YA BIASHARA STENDI KUU TUNDUMA

Imewekwa : November 9th, 2022

SONGWE: Shirikisho la Umoja wa Machinga Tanzania (SHIUMA) Mkoa wa Songwe wamempongeza Rais wa Tanzania, Mhe. Samia Suluhu Hassan kwa kuwapatia fedha shilingi milioni 10 za ujenzi wa Ofisi ya Mkoa ya wamachinga.

SHIUMA wametoa pongezi izo walipokutana na Mkuu wa Mkoa wa Songwe, Mhe. Waziri Kindamba ofisini kwake kwa ajili ya kujadili mambo mbalimbali ya maendeleo ya machinga.

Mwenyekiti wa wamachinga Mkoa wa Songwe, Ndg. Kelvin Kyando amesema pamoja na milioni 10 za ujenzi wa ofisi Bado Mhe. Samia Suluhu Hassan ametoa fedha milioni 383 za kuanzia ujenzi wa soko la machinga Tunduma, soko ambalo likikamilika litakuwa na thamani ya Bilioni 6.9 kwa kweli tunamshukuru sana Rais Samia Suluhu Hassan.

"Tunaamini soko likikamilika litawasaidia machinga wengi wakiwemo wale ambao wako soko la Iboya kufanya biashara zao kwa uhuru na ufanisi, ata hivyo tunawashukuru Halmashauri ya Mji wa Tunduma kwa jinsi walivyowapanga vizuri machinga katika sehemu ambazo kuna wateja" Kelvin Kyando Mwenyekiti wa Machinga.

"Stendi ya Kuu ya Mabasi ya Tunduma iliyopo Mpemba imetusaidia sana sisi machinga imeweza kuchukua wamachinga wengi, wale wenye vibanda ni zaidi ya 1200 achilia mbali wanaouza kwenye mabango, mabox na Nyungo kwa hili tunaishukuru sana Serikali ya Halmashauri ya Mji Tunduma" Kelvin Kyando.

Mkuu wa Mkoa wa Songwe, Mhe. Waziri Kindamba ametoa wito kwa wamachinga kushirikiana kwa pamoja ili waweze kufanya vitu vikubwa kwa pamoja wakati huu ambao Serikali ya Mhe. Samia Suluhu Hassan inatoa ushirikiano mkubwaa kwa wamachinga.

Mkuu wa Mkoa, Mhe. Waziri Kindamba amesema kwa sasa baada ya Rais, Mhe. Samia Suluhu Hassan kuifungua Nchi wawekezaji wengi wameonyesha nia ya kuja kuwekeza Songwe na Serikali inaendelea kuleta fedha nyingi za utekelezaji wa miradi mbalimbali hivyo ni wakati sasa machinga kuchangamkia fursa zitakazojitokeza.

"Katika kuishi hapa nataka kugusa maisha ya watu wote wakiwemo machinga na siku nikiondoka nataka mnikumbuke kwa mema kwani binadamu hatujaletwa Duniani kukandamizana tumeletwa kusaidiana" Mhe. Waziri Kindamba.

Aidha, Mkuu wa Mkoa ametoa wito kwa machinga kujiunga katika vikundi vya uzalishaji ili waweze kunufaika na mikopo ya asilimai 10 inayotolewa na Halmashauri.