SERIKALI YATOA MTAMBO WA KUCHAKATA HEWA YA OXJENI HALMASHAURI YA TUNDUMA

Imewekwa : February 10th, 2023

Na William Maganga,Tunduma

Serikali imetoa kifaa cha kisasa cha kuzarisha hewa ya Oxjeni pamoja na mitungi 63 itakayo msaidia mgonjwa mwenye shida ya upumuaji sambamba na vifaa vya upasuaji na upimaji katika Halmashauri ya Mji Tunduma wilayani Momba mkoani Songwe.

Akizungumza leo tarehe 10/2/2023 Mganga mkuu wa Halmashauri hiyo Dkt. Enock Mwambalaswa amesema Serikali ya Jamhuri ya Muungano wa Tanzania inayoongozwa na  Rais Mhe. Dkt. Samia Suluhu Hassan imeleta vifaa hivyo na bado gharama yake haijatolewa kwani bado vifaa vingine vinaendelea kuja na kwamba kinu hicho cha kuzalisha hewa kitaweza kuhudumia wagonjwa wa ndani na nje ya Tunduma.

Alisema sambamba na hilo pia serikali imewapa vifaa vya Milioni 370 vikiwemo vya upasuaji hali nitakayoongeza utoaji wa huduma za matibabu na kumudu wingi wa watu hasa ukichukulia Tunduma ni Lango Kuu la nchi za SADC hali iliyopelekea kuwa na muingiliano mkubwa wa watu.

Dkt. Mwambalaswa alisema vifaa hivyo ni vya kisasa zaidi kama kifaa kinachoruhusu hewa ya Oxjeni kumfikia mgonjwa (Flow meter with humidifier), Kifaa cha kupimia umeme kwenye moyo (Electro cardiograph), Kifaa cha kubebeka cha mionzi laini (portable ultrasound), Kifaa cha kupimia macho (wall mounted ophthalmoscopes), na Kifaa cha mionzi mizito (X-Ray ).

 Alivitaja vifaa vingine kuwa ni Meza ya kubebea wagonjwa (stretchers), Mtambo wa kuchakata na kutunza hewa ya Oxjeni (PSA Oxygen generating plant),Vifaa anavyo vaa mtaalam kujikinga na mionzi (Protective gear for X-Ray), Vifaa vya kumuongezea mgonjwa hewa ya Oxjeni (ventilator) na vifaa mbalimbali vinavyosaidia wakati wa upumuaji (Endotracheal tubes).

Mkurugenzi wa Halmashauri ya Mji Tunduma, Philemon Magesa, “Serikali ya awamu ya sita chini ya Rais Mhe. Dkt. Samia Suluhu imefanya kazi kubwa ya kuhakikisha wananchi wanakuwa na uhakika wa kupata matibabu salama kwa kuwapatia vifaa hivi, ni jukumu letu sasa wataalamu kuvitumia kwa weledi na uadilifu ili vidumu katika kuwatibu walengwa” alisisitiza Mkurugenzi Magesa

Aliongeza kuwa mbali na hilo “Serikali imetupatia fedha zinazotumika kujenga vituo vitano vya afya lengo ni kuhakikisha wananchi wa Mji wa Tunduma wanasogezewa huduma karibu huku Halmashauri kwa kutumia fedha za mapato ya ndani asilimia 70 tunazitumia kujenga miradi ya maendeleo” alisema Magesa

Tunduma ni lango kuu la nchi za kusini mwa Afrika (SADC) hivyo, kutokana na muingiliano mkubwa wa wananchi wanaoutumia mpaka huu, Rais wa Jamhuri ya Muungano wa Tanzania Mhe. Dkt. Samia Suluhu Hassan ameona aongeze nguvu kwenye sekta ya afya kuongeza uhakika wa matibabu kwa wananchi wa ndani na nje ya Tunduma

Kwa upande wa wananchi wa Mji wa Tunduma akiwemo Isakwisa Mwashilindi alisema wanakila sababu ya kumshukuru Rais wa Jamhuri ya Muungano wa Tanzania Mhe. Dkt. Samia Suluhu Hassan kwa kazi kubwa aliyoifanya ya kuwajali wananchi wake kwa kuleta vifaa vya aina hiyo na kwamba huduma za afya zimeboreshwa mara dufu ukilinganisha na ilivyokuwa awali.